Rodriguez, di axaftina xwe ya li Konferansa Bêçekkirinê ya li Cenevreyê de diyar kir ku Washington li hemberî Kubayê rageşiyeke êrîşkar dimeşîne.
Rodriguez destnîşan kir ku DYA di qada enerjiyê de ambargoyeke pratîkî pêk tîne. Wî angaştên ku dibêjin Kuba ji bo ewlehiya neteweyî ya DYA’ê gefeke neasayî û awarte ye wekî absurd bi nav kir. Rodriguez da zanîn ku ev nêzîkatî armanc dike ku welat ji aliyê aborî û mirovî ve bixe tengasiyeke mezin û wekî “hewldana karesateke mirovî” bertek nîşan da.
Tê gotin ku Serokê DYA’ê Donald Trump di hefteyên dawî de ambargoya ku ji sala 1962’an û vir ve dewam dike hîn tundtir kiriye û zextê li welatên din dike ku petrolê ji Kubayê re neşînin. Rêveberiya Kubayê jî dibêje ku ev gav rasterast gelê giravê dikin hedef û li dijî hiqûqa navneteweyî ne.
Di 13’ê Sibatê de Komîserê Bilind ê Mafên Mirovan ê Neteweyên Yekbûyî (NY) Volker Turk jî diyar kiribû ku xirabûna rewşa sosyo-ekonomîk a li Kubayê fikarên kûr çêdike û banga xwe ya ji bo rakirina cezayên yekalî yên li ser sektoran dubare kiribû.
