Miguel Diaz-Canel têkildarî rageşiya ku bi DYE’yê re zêde dibe, daxuyanî da û diyar kir ku li dijî êrîşeke muhtemel mafê Kubayê yê xweparastinê heye.
Diaz-Canel li ser platforma medyaya dîjîtal X’ê daxuyanî da û got, “Kuba ya ku rû bi rûyê êrîşên piralî yên DYE’yê maye, li dijî êrîşeke leşkerî mafekî mutlaq û rewa ye ku xwe biparêze.”
Lîderê Kubayê her wiha hişyarî da ku mudaxileyeke muhtemel a DYE’yê, wê bibe sedema ‘xwînrijandineke mezin’.
ÎDÎAYA ‘ZÊDEYÎ 300 DRONÊN LEŞKERÎ’
Saziya çapemeniyê ya Emerîka Axios îdîa kir ku Kubayê zêdeyî 300 dronên leşkerî kirîne û got, Kuba li ser sernaryoyên ku çawa van dronan li nêzî Baregeha Behra Guantanamo Bay a DYE’yê bi kar bîne, dixebite.
Li gorî nûçeya ku Axios spartiye “belgeyên îstixbaratê yên veşartî”, vê rewşê li Washingtonê fikar çêkir. Hat diyarkirin ku rayedarên DYE’yê kapasîteya leşkerî ya Kubayê weke “gefeke ku zêde dibe” nirxandin.
RÊVEBERIYA TRUMP RAGEŞIYÊ ZÊDE DIKE
Serokê DYE’yê Donald Trump, Kubayê ji bo ewlehiya neteweyî ya DYE’yê weke “gefeke mezin” pênase dike. Hat ragihandin ku Trump di dema dawî de zexta li ser Kubayê zêde kiriye. Hat diyarkirin ku Trump behsa “kontrolkirina giravê” jî kiriye.
Li rex ambargoya DYE’yê ya ku ji sala 1962’yan ve li ser Kubayê tê pêkanîn, rêveberiya Washingtonê di meha çileyê de li dijî Kubayê dorpêça petrolê jî berfireh kiribû. Di destpêka meha Gulanê de jî rêveberiya Trump paketên pêkanînên nû yên li hemberî Havanayê, erê kir.
Rêveberiya Kuba jî DYE’yê sûcdar dike ku zemînê mudaxileya leşkerî amade dike. Kuba dibêje ku ti plana wan a ji bo êrîşkirina welatên din, nîne.
