Li bajarê San Diegoyê, êrişeke çekdarî li ser Navenda Îslamê û mizgeftê hate kirin. Di êrişê de 3 kesî jiyana xwe ji dest dan. Rayedaran diyar kirin ku 2 ciwanên êriş kirin beriya polîs bigihêjin cihê bûyerê xwe kuştin.
Hate ragihandin ku êrişkar serê sibehê ketin Navenda Îslamê ya San Diegoyê ku di heman demê de dibistanek ji bo zarokan lê heye. Hate gotin, yek ji kesên jiyana xwe ji dest dan wezîfedarekî ewlekariyê bû.
‘ÊRIŞA ÎSLAMOFOBÎK’
Şefê polîsan ê San Dieogyê Scott Wahl anî ziman ku êrişkar 17 û 18 salî bûn û li gorî agahiyên destpêkê, dibe ku êriş Îslamofobîk be.
Wahl got, “Gotinên nefretê bi şênberî tê dîtin.” Êrişkar piştî bûyerê di wesayiteke li derdorê mirî hatin dîtin. Hate ragihandin ku êrişkaran bi çekê dawî li jiyana xwe anîn.
Li gorî daxuyaniya polîsan, dayika yek ji êrişkaran serê sibehê îxbar kiriye û gotiye, “Ji malê reviya ye û bi meyla xwekuştinê ye.” Hate ragihandin ku ciwanê êrişkar bi wesayit û çekê ji malê çûbû.
Êriş di roja destpêkê ya meha Zîlhîcceyê de hate kirin ku ji bo Misilmanan pîroz tê dîtin. Piştî bûyerê Serokê DYE’yê Donald Trump êriş weke “Rewşeke metirsîdar” pênase kir.
Waliyê Kalîforniyayê Gavin Newsom jî got, “Cihê nefretê li Kalîforniyayê nîne.”
