Serokê Meclîsê Nûman Kûrtûlmûş di Civîna Nirxandina Sala Qanûndanînê ya 3’emîn a Serdema 28’emîn de li pêvajoya aştiyê daxuyanî da.
Kûrtûlmûş got, “Divê em bi lezînin” û anî ziman ku pêvajo hem li gorî maf û rûmeta Kurdan hem jî li gorî hesasiyetên Tirkan tê meşandin.
Kûrtûlmûş got, “Li aliyekî hûn ê maf û rûmeta Kurdan li ber çavan bigirin, li aliyê din jî hûn ê hesasiyet û rûmeta Tirkan li ber çavan bigirin ku piraniya Tirkiyeyê ye. Lewma li gorî vê hevsengiyê heta niha hat.”
HEVDÎTIN HÎN DI ROJEVÊ DE NÎNE
Kûrtûlmûş bal kişand ser bangên Rêber Apo û anî ziman ku şewitandina çekan û xwe fesixkirina PKK’ê wê pêvajoyê bilezîne. Ji bo pirsa “Gelo komîsyon wê hevdîtinê bi Ocalan re bike?” Kûrtûlmûş got, “Hîn nehatiye rojevê.”
Kûrtûlmûş got, “Eger bikeve rojevê wê komîsyon biryarê bide. Biryar bi piraniya dengan tê wergirtin. Biryar ne di destê min de ye, ji destpêkê ve hemû biryar bi piraniya dengan tê wergirtin. Her tişt li pêş çavên raya giştî diqewimin.”
Kûrtûlmûş destnîşan kir ku wezîfeya komîsyonê qanûndanîn nîne, şopandina pêvajoyê û pêşkêşkirina çarçoveyekê ye û got, Serokê MÎT’ê û wezîr wê tevlî civîna dawî ya guhdarîkirinê bibin.
QANÛNÊN PÊWENDÎDAR WÊ DI DEMEKE NÊZ DE BÊNE DERXISTIN
Kûrtûlmûş got, “Ev komîsyon ne ew komîsyon e ku qanûnekê amade bike. Wezîfeya bingehîn a vê komîsyonê şopandina serxistina vê pêvajoyê ye, kontrolkirin e, pêşengî ye, amadekirina çarçoveyekê ye. Em ê bibêjin di van mijaran de divê ev gav bêne avêtin û bi vî rengî çarçoveyeke bingehîn pêşkêşî Meclîsê bikin.”
Kûrtûlmûş got, “Wezîfeya komîsyonê ev e” û bi vî rengî dewam kir: “Ji xwe dema ku partiyên li vê derê li hev kirin, çarçoveyeke bingehîn danîn, ku înşaleh wê bi vî rengî be, hingî di vê mijarê de derxistina qanûnan wê gelekî hêsan be. Di demeke kurt de wê qanûnên pêwendîdar bêne amadekirin.”
Serokê Meclîsê li ser nîqaşên têkildarî destûra bingehîn a nû de anî ziman ku destûra bingehîn a niha bersivê nade pêwîstiyên Tirkiyeyê, nûkirina destûra bingehîn û qanûnan pêwîstî ye.
