Serokê Meclisê Nûman Kurtulmuş bi midûrê karên nivîsê yên hin saziyên çapemeniyê re hevdîtin kir.
Kurtulmuş bersiv da pirsên li ser banga Rêber Apo û got, “Ez hêvî dikim ku siyaset jî li ser xeteke hevpar, maqûl bimîne û ji bo demildest dawî li vê yekê were her kes berpirsyariya xwe bi cih bîne.”
Kurtulmuş anî ziman ku ev mijar ne mijara nîqaşê ye û wiha wiha domand: “Pêvajoyeke ku ji bo fêdeya Tirkiyeyê ye.”
‘MECLIS WÊ BERPIRSYARIYA XWE BI CIH BÎNE’
Kurtulmuş bi bîr xist ku Şandeya Îmraliyê ya DEM Partiyê serdana partiyan dike û wiha axivî: “Ji ber vê yekê li Îmraliyê çi hatiye axaftin, çi bûye, vê pêvajoyê wê bibêjin. Helbet Meclisa Mezin a Tirkiyeyê cihê ku hemû pirsgirêkên Tirkiyeyê lê tên çareserkirin e. Ji ber vê yekê wê pirsgirêk bi helwesta hevpar a partiyên siyasî yên li Meclisê çareser bibe. Dema ku pêwîst be em ê bikevin dewrê û bi awayekî zelal, vekirî û jidil bimeşînin. Meclis jî wê berpirsyariya xwe bi cih bîne.”
Kurtulmuş der barê nîqaşên destûra bingehîn de jî got, “Wê pêşî li ser cewherê destûra bingehîn nîqaş bên kirin, paşê li ser naveroka wê nîqaş bên kirin û herî dawî jî Meclis wê rêbazeke hevpar pêş bixe.”
‘DESTÛR BINGEHÎN Û PÊVAJOYA ÎMRALIYÊ MIJARÊN JI HEV CUDA NE’
Kurtulmuş destnîşan kir ku ti eleqeya lêkolînên destûra bingehîn bi pêvajoya Îmraliyê re nîne û wiha lê zêde kir: “Tişta ku ez li vir bi israr dixwazim balê bikşînim ev e. Bi taybetî jî ti têkiliya pêvajoya Îmraliyê û xebatên destûra bingehîn a nû re nîne. Beriya ku gava yekem a pêvajoya Îmraliyê were avêtin jî, salek an jî 1,5 sal berê, me ji roja yekem a vekirina serdema 28’an a Meclisê dest bi mijarê kir. Ji ber vê her du mijar ji hev cuda ne û divê em van herduyan tevlîhev nekin.”
