Meclisa Jinan a Partiya Wekhevî û Demokrasiyê ya Gelan (DEM Partî) bi şiyara “Jinên tên qetilkirin sedema Rraperîna me ye, rêxistinbûn xweparastina me ye” li Wan, Îzmîr, Mêrsîn û gelek bajaran çalakî li dar xist.
WAN: TEKANE RÊYA ME YA DERKETINÊ XWEPARASTIN Û RÊXISTINBÛN E
Bi sedan jin li navenda bajarê Wanê li ber AVM a Aydin Perihan kom bûn û li dijî qetilkirina jinan meşiyan. Berdevka Meclîsa Jinan a DEM Partiyê Halîde Turkoglu diyar kir ku qetilkirina jinan gihîştiye asta şer û qirkirinê. Turkoglu tekane rêya li dijî qetilkirina jinan xweparastin û rêxistinbûn e û got, “Em jin li her derê qadên xwe yên rêxistinkirinê ava dikin. Sazî, komele û meclîsên jinan qadên ku jin lê têne parastin in. Em ê bi avakirina meclîsên taxan û jinan çareseriyan ji bo tundiya li dijî jinan bibînin.Banga me ji bo hemû jinan ev e ku werin em xwe birêxistin bikin, werin em bi hev re kuştina jinan rawestînin, werin em serî hildin, werin em xwe birêxistin bikin û parastina xwe ava bikin. Di serdema ku pirsgirêka Kurd û demokratîkbûn tê nîqaşkirin, bêyî çareserkirina pirsgirêkên jinan aştiya rastîn ne pêkan e.”
ÎZMÎR: PÊWÎSTIYA ME BI DARAZ Û MECLÎSEK KU ZILAMAN NAPARÊZE HEYE
Parlamentera Îzmîrê Burcugûl Çubuk di çalakiya li Îzmîrê de axivî û diyar kir ku ji bo pêşîgirtina qetilkirina jinan, divê dadgeh û meclîs dev ji parastina zilaman berdin û got: “Heta ku qetilkirina jinan ji aliyê civakê ve weke nerewa neyê dîtin, ev yek nayê sekinandin. Îdam ne çareserî ye, mekanîzmayên astengker û têkoşîna rêxistinbûyî hewce ye.”
MÊRSÎN: RÊXISTIBÛNA ME XWEPARASTINA ME YE
Hevseroka DEM Partiyê ya Mêrsînê Bedriye Kuş got ku qetilkirina jinan berpirsyariya dewletê û mekanîzmayên dadê ye. Bedriye Kuş êrîşên desthilatê yên li ser mafên jinan, polîtîkayên qeyûman û biryarên weke “Sala Malbatê” rexne kir û wiha got: “Polîtîkayên ku jinan di nav malbatê de asê dikin, xizmetê ji pergala serdestiya mêran re ferz dike. Çareserî avakirina civakî ku jin di tê de azad e û wek li ser bingehek wekheviyê pêkan e.” Kuş banga rêxistinbûnê li jinan kir û got, “Her rêxistinbûna jinan jiyanekê xilas dike.”
