Serokê Giştî yê CHP’ê Ozgur Ozel ê ku li Navenda Giştî ya Partiya Gel a Komarê (CHP) di nobetê de bû cihê ku bi daxwaza Kemal Kılıçdaroglu bi awayekî “tedbîrî” hatibû ser erkê polîsan mudaxale kiribû, ji ber avahiyê veqetiya û tevî parlamenter û rêveberên partiyê ber bi Parlemena Milî ya Mezin a Tirkiyeyê ve meşiya. Bi hezaran kesan piştgirî da meşê.
Girseya gel di dema meşê de dirûşmên “Kemalê xayîn” berz kirin û dan zanîn ku ew biryara “bêhukmiya teqez” nas nakin û ev yek “darbe” ye. Korteja meşê ya ku hat ber Deriyê Dikmenê yê parlemenê, bi barîkatên polîsan û TOMA’yan re rûbirû ma. Ozel, ji bo silavkirina girseya ku li wir li benda bûn, derket ser TOMA’yê. Hat ragihandin ku ji ber dorpêça polîsan hemû derketin û ketinên parlemenê hatine girtin.
Ozel, di mîtînga ku li Parka Parlamenê hat lidarxistin de axivî û endamên partiyê yên ku bi rojên dirêj e li CHP’ê di nobedê de ne silav kir. Ozel parast ku piştî serkeftina di hilbijartinên 31’ê Adarê de zextên desthilatdariyê zêde bûne û got, ji ber ku em bi ser ketin em zilmê dibînin. Ji ber ku me ew têk bir û em ê dîsa têk bibin, em dibin armanc.
Ozel di axaftina xwe de bal kişand ser nîqaşên navxweyî yên partiyê û rexneyên li ser xwe û got, “Hûn nikarin min bi zext û zilmê terbiye bikin. Hûn nikarin bi gazê min bitirsînin. Ez careke din hînî têkçûnê nabim.”
Ozel pêvajoya 19’ê Adarê wekî “darbe” bi nav kir û diyar kir ku ev yek mudaxaleyek li dijî Ekrem Îmamoglu ye. Ozel mudaxaleya li ser Navenda Giştî ya CHP’ê jî wekî “dagirkerî” pênase kir û got, “Ji bilî gaza îsotê ya desthilatdariyê, tu tiştekî vê partiyê nîn e ku jê paqij bibe.”
Ozel got, “Ji vê saetê û pê ve navenda me ya giştî parlemen e” û destnîşan kir ku CHP bi awayekî fîîlî hatiye girtin û bang li endamên partiyê kir ku “CHP’ê cara sêyemîn vekin.” Ozel peyama “Em teslîm nabin, em serî natewînin, em paş de gavan navêjin” da.
