Li Albanyayê ji 30’ê Gulanê û vir ve xwepêşandanên li pêşberî ofîsa Serokwezîr Edi Rama berdewam dikin. Xwepêşander, daxwaz dikin ku projeya tûrîzmê ya girêdayî malbata Trump were betalkirin û Serokwezîr Rama îstifa bike.
KONSERA KANYE WEST NERAZÎBÛN ZÊDETIR KIRIN
Di dema xwepêşandanan de, li bajêr konsera rapvanê Emerîkî Kanye West hat lidarxistin. Li gorî nûçeyên di çapemeniya herêmî de hat gotin ku ji ber firotina kêm a bilêtan, hikûmetê 4 mîlyon euro piştgiriya darayî daye vê konserê. Serokwezîr Rama ev piştgirî qebûl kir û got ku wan ev pere daye da ku konser neyê betalkirin û navê welat xirab nebe.
‘JI BO NEXWEŞXANEYAN PERE TUNE YE, JI BO KONSERÊ HEYE’
Ev piştgiriya darayî ya hikûmetê nerazîbûna xwepêşanderan zêdetir kir. Welatiyan pankartên mîna “4 mîlyon euro ji bo konserê heye, ji bo nexweşxaneyan tune ye” û “Pêdiviya me bi nexweşxaneyan heye, ne bi konserê” hildan.
DI BINGEHA NERAZÎBÛNAN DE PROJEYA TÛRÎZMÊ HEYE
Ev çalakiyên ku jê re “Şoreşa Flamingoyan” tê gotin, li dijî projeyeke luks a tûrîzmê dest pê kirin. Ev projeya ku tê gotin bi malbata Trump re têkildar e û nirxê wê 4,6 mîlyar dolar e, dê li herêmên xwezayî yên parastî Sazan û Zvernec were çêkirin. Parêzvanên jîngehê, diyar dikin ku ev proje dê zirarê bide ekosistemê û çûkên koçber.
