Li gelek navendên Bakur û Rojhilatê Sûriyeyê komploya navneteweyî ya li hemberî Rêber Apo hate protestokirin.
QAMIŞLO
Ji bo şermezarkirina Komploya Navneteweyî ya 15’ê Sibatê ya li dijî Rêber Apo, bi diruşmeya “Emê Roja Reş Bikin Roja Azadiya Rêber Apo” mîtîngek hate lidarxistin.
Bi deh hezaran şêniyên bajarê Qamişlo, Tirbespiyê, Til Hemîs û Amûdê li bajarê Qamişlo ya Kantona Cizîrê li Stadyuma 12 Adarê hatin ba hev û mitîngeke girseyî lidarxistin.
Beriya mitîngê meşeke girseyî hate lidarxistin. Di meşê de wêneyên Rêber Apo, pankartên “Ramanên Serok Apo dêriyê aştiya cihanê û Rojhilata Navîn e”, “Bi Rihê Berxwedana Apoyî, Em ê Komployê Têk Bibin” hatibûn hildan û dirûşmeyên “Na Ji Komplogeran Re”, “Bê Serok Jiyan Nabe” û “Jin Jiyan Azadî” hatin berz kirin.
Piştî deqeyek rêzgirtin li ser giyanê şehîdan, dengê Rêber Apo ku hatibû amadekirin hat guhdarkirin.
‘BI XURTKIRINA BERXWEDANÊ EM Ê RÊBER APO RIZGAR BIKIN’
Piştre jî Endama Desteya Hevserokatiya Partiya Yekitiya Demokratîk (PYD) Foza Yûsif, roja reş şermezar kir û got, “Dewleta Tirk a dagirker bi rêya vê komployê re xwest ku gelê Kurd bê îrade bihêlin û wan tune bikin. Lê ev roj bû roja berxwedaniya me ya li hember dijmin û me ji wê rojê ve soza têkoşînê da. Dewleta Tirk dixwaze bi komkujiyan û xwînrijandinê Kurdan tune bike, lê berxwedana me li dijî her cure êrîş, bersiva herî bi bandor e. Em ê serketinê bi dest bixin. Em ji vê qadê bang dikin, divê dewleta Tirk êdî dev ji siyaseta xwe ya qirêj a li hemberî gelê me berde. Pêwîst e çareseriyeke siyasî bê pêkanîn. Azadî bi xwînrijandinê nayê bi destxistin. Ez dixwazim vê yekê ji gelê me yê Herêma Bakur û Rojhilatê Sûriyeyê re bibêjim: Çiqas em berxwedaniya xwe bi hêz bikin, em ê ewqas nêzî armanca xwe bibin. Em ê ti carî jiyanek bêwelat nepejrînin. Em ê dijmin têk bibin û Rêberê xwe rizgar bikin.”
‘RÊBER APO HÊZ Û ÎRADE DA TEVAHIYA NETEWAN’
Serokê Meclîsa Qebîleya Tey û Endamê Meclîsa Rûsipiyên Herêma Bakur û Rojhilatê Sûriyeyê Hesen Ferhan, jî wiha axivî: “Em îro bi saya Rêber Abullah Ocalan hene. Rêber Apo hêz û îrade da tevahî netewan. Rêber Apo ji bo me ne tenê Serokê Gelê Kurd e, serokê tevahiya mirovahiyê û aştiyê ye. Rêber Apo em hemû anîn ba hev û kir yek da ku xaka xwe biparêzin. Em ê roja reş veguherînin roja serxwebûnê û azadiya Rêber Abdullah Ocalan.”
DÊRIK
Înîsiyatîfa Gel a Ji Bo Azadiya Rêber Abdullah Ocalan li bajarê Dêrikê bi armanca şermezarkirina salvegera komploya 15’ê Sibatê, bi dirûşmeya “Em ê roja reş bikin roja azadiya Rêber Apo” li pêşiya Navenda Ciwanên Şoreşger mitîngek lidar xist.
Di mitînga ku bi hezaran kes beşdar bûn de, wêneyên Rêber Apo hatin hildan û dirûşmeyên, “Bê Serok jiyan nabe” û “Azadiya Ocalan azadiya gelên herêmê ye” hatin berzkirin.
Piştî deqeyek rêzgirtinê Endama Rêveberiya Kongra Star a Dêrikê Wefa Elî axivî û diyar kir ku têkoşîna gelê Kurd û gelên cîhanê ya li dijî Komploya Navneteweyî wê heta azadiya fîzîkî ya Rêber Apo bidome.
Wefa Elî, da zanîn ku rêya aştiyê di Îmraliyê re derbas dibe û diyar kir ku ew ê bi têkoşîna xwe Rêber Apo azad bikin, civaka demokratîk a azad ava bikin.
Hevserokê Partiya Yekîtiya Demokratîk (PYD) Xerîb Hiso jî di mitîngê de axivî û wiha got: “Em ji vir silavên xwe yên şoreşgerî ji Rêber Abdullah Ocalan re dişînin. Berxwedanê hemû komployên li dijî doza gelê Kurd û gelên Rojhilata Navîn têk birin. Helwesta gel û beşdarbûna pêngavên ji bo azadiya Rêbertî hatine destpêkirin, ji civaka navneteweyî re peyameke zelal bû. Pêkhateyên herêmê yekîtiya xwe pêk anîne û mafên xwe yên rewa dixwazin. Van gelan pêşeroja xwe di fikir û felsefeya Rêber Abdullah Ocalan de dîtine û heta azadiya Rêbertî pêk bê ev gel wê têkoşîna xwe berdewam bikin. Rêber Abdullah Ocalan bîrewer û fîlozofek e. Beriya her tiştî mirovekî aştîxwaz e, hêza wî heye ku gelek pirsgirêkên Rojhilata Navîn çareser bike.”
Mitîng bi berzkirina dirûşmeya “Bê Serok jiyan nabe” bi dawî bû.
TEBQA
Bi hezaran şêniyên kantona Tebqayê bi hemû pêkhateyên xwe, şêx û rûspiyên eşîran, nûnerên Rêveberiya Xweser, partiyên siyasî, rêxistin û tevgerên jinan, kesayetên olî, rêxistinên civakî û koçberên ji kantona Efrîn û Şehbayê ji bo şermezarkirina 26’emîn salvegera Komploya Navneteweyî (15 Sibat) ya li dijî Rêber Apo meşek lidar xist.
Girseya gel bi hildana wêneyên Rêber Apo û vekirina pankartên “Em ê roja reş bikin roja azadiya Rêber Apo û azadiya gelên têkoşer” li pêşiya Sûka Taxa Ewil dest bi meşê kir. Di meşê de dirûşmên “Gel azadiya Rêber Abdullah Ocalan dixwaze” û “Bijî berxwedana Îmraliyê” hatin berzkirin.
Piştî mesa ku heta Çerxerêya El Hadirî ya li taxa Duyemîn (El Sanî) dom kir, mîtîngek hat lidarxistin. Piştî deqeya rêzgirtin, endamê Înîsiyatîfa Sûriyeyê ya Azadiya Rêber Abdullah Ocalan a Kantona Tebqayê Riyad El Walî axivî.
Riyad El Walî got: “Vaya gelê Firatê derketine da ku bi yek dengî bêje: Na ji dagirkeriya Tirk re û na ji Komploya Navneteweyî ya li dijî Rêber Abdullah Ocalan re.”
El Walî anî ziman ku gelê Herêma Bakur û Rojhilatê Spriyeyê dê heya rizgarkirina herêmên dagirkirî û pêkanîna azadiya fîzîkî ya Rêber Apo li qadan bin.
Mîtîng bi gerandina dîlanê û berzkirina dirûşmên “Bê Serok jiyan nabe” bi dawî bû.
REQA
