Doh êvarê encamên despêkê yên hilbijartina parlementa Iraqê hatin ragihandin. Piştî ku diyar bû hin ji namzetên PDK’ê yên herêma Behdînanê bi serneketin, alîgir û xizmên wan ên ji eşîrên li deverê ne, derketine ser kolanan û nerazîbûnê nîşan didin.
Şeva din jî li nêzî Sêriyana Amyan a li nêzî bajaroka Berdereş gelek endam û alîgirên PDK’ê derketin ser rêya sereke ya Dihok-Hewlêrê û rê li trafîkê girtin. Li dijî PDK’ê dirûşmeyan bilind kirin. Diyarkirin ku tevî devera wan ji aliyê PDK’ê ve hatiye paşguhxistin, vê carê jî xiyanet li dengê wan û namzetên wan hatiye kirin.
Li aliyê din eşîreta Silêvaniyan rêya Dihok-Zaxo girtin, eşîreta Mîsa Reşiyan jî rêya Zaxo-Îbrahîm Xelîl li trafîkê girtin. Eşîreta Goran jî rêya Berdereş-Dihok û Hewlêrê li trafîkê girtin.
Li beramberî van nerazîbûnan PDK’ê bi hêzên xwe yên leşkerî ve rûbirûyê xwepêşandanan bû, bombeyên gazê bikaranîn. Lê nekarîn dawî li nerazîbûnan bînin. Niha jî xwepêşandan û nerazîbûn dewam dikin.
