Federasyona Komeleyên Piştgirî û Piştevaniya Bi Malbatên Girtî û Hikûmxwaran re (TUHAD-FED), li dijî sepanên Lijneya Îdare û Çavdêriyê ya Girtîgehan (ÎGK) ku berdana girtiyên jin asteng dike, li ber Wezareta Edaletê daxuyanî da. Endam û nûnerên partiyên siyasî, saziyên demokratîk, saziyên hiqûqî û gelek kes tevlî daxuyaniyê bû.
Endama OHD’ê Berfîn Babaoglu daxuyanî xwend. Berfîn Babaoglu anî ziman ku heta bêhiqûqiya li girtîgehan bi dawî bibe ew ê têkoşîna xwe bidomînin û got: “Heke li welatekî qala aştî, siyaseta demokratîk bê kirin û li hevkirina civakî bê kirin, gava herî şênber girtîgeh in. Girtiyên jin ku bi salan e di girtîgehê de ne û tevî cezayê wan ê bi awayekî li dijî hiqûqî temam bûye jî vê carê berdana wan bi biryarên keyfî yên Lijneya Rêveberî û Çavderiyê ya Girtîgehê tê taloqkirin. Aştî ne tenê bi dawîbûna şer û pêvçûnan e. Aştî ew ê ku mirov ji ber fikir û ramanên xwe neyên cezakirin e. Ji aliyekî vê qala aştiyê bikin û ji aliyê din ve jî berdana girtiyan asteng bikin ew yek nakokiyeke pir mezin e. Em li vir bang dikin; Di serî de girtîgeha Sîncanê û li hemû girtîgehan girtiyên ku înfaza wan temam bûye, divê bên berdan û astengiyên li pêşiya berdana wan bên rakirin. Heta hevalên me bên berdan, sepanên li dijî hiqûqî li girtîgehan bi dawî bibin û mirov ji ber fikir û remanên xwe neyên cezakirin em ê têkoşîna xwe bidomînin.”
‘DIVÊ DEMILDEST GIRTIYÊN SIYASÎ BÊN BERDAN’
Parlamenterê DEM Partî yê Amedê Serhat Eren jî diyar kir ku ew li ber Wezareta Dadê ku ji bêhiqûqiyê re çavê xwe digirê daxuyaniyê didin û wiha axivî: “Lijneya Rêvêberî û Çavderiyê bi awayekî li dijî hiqûqî berdana girtiyan asteng dike. Ew lijne li dijî hiqûqê bi awayekî tol hilanînê tevdigerin. Ew sepan li dijî pêvajoyê ye. Ew lijne li dijî pêvajoyê tevdigere. Rêya aştiyê ji vêbûna deriyên girtîgehê derbas dibe. Em bang li Wezaretê dikin ku li dijî sepanên vê lijneyê bikevin tevgere û lêpirsînê bidin destpêkirin. Heke vê yekê nekin em ê vê lijneyê gilî bikin. Ji bo berdana girtiyên siyasî li benda çi teyîd û tespîte ne. Divê demildest girtiyên siyasî bên berdan û heta hevalên me azad bibin em ê têkoşîna xwe bidomînin.”
Daxuyanî bi berzkirina dirûşmeyên “Jin Jiyan Azadî”, “Bijî berxwedana zindanan” û “Girtî rûmeta me ne” bi dawî bû.
