Li cografya Botanê ku ji ber birîna daran, lêgerîna li maden û petrolê bi rêk û pêk ekolojî tê talankirin, gef li ser jiyana hemû zindiyan e. Ji bo rabûna li ber vê talanê ku nêzî 9 sal in bi rêk û pêk dewam dike, bi hezaran kes li hev kom bûn û bi dirûşmên ‘Em aştiyê dixwazin, ne bendavan’ li navenda Şirnexê meşiyan. Girseya gel piştî meşê daxwazên xwe anî ziman û banga rawestandina talankirina xwezayê kir ku zerarê dide her kesî. Bi vê armancê jî berê xwe da herêma Bestayê ku lê dar têne birîn û dest bi nobedê kir.
ZÊMARA LI SER DARÊN HATIN BIRÎN
Dayikên ku çav li darên hatine birîn ketin, bi hev re zêmar gotin. Dayikên ku li ber birîna daran ketin, li ser her dareke hate birîn zêmarek gotin. Ji dayikan Aşye Akar bal kişand ser talankirina xwezayê û ji bo rawestandina vê qetilkirinê bang kir. Ayşe Akar ragihand ku weke dayik wê li ber xwe bidin û bi zêmara xwe ya li ber darên hate birîn bû qîrîna bêdeng a darên li Cûdî, Gabar û Bestayê hatin birîn.
‘LI PÊŞBERÎ VÎ DÎMENÎ DILÊ MIROVAN DIÊŞE’
Ayşe Akar anî ziman ku li hemberî talanê ew ji mala xwe rabû, hat Bestayê û got, “Ev der xaka me ye, darên me ne, bexçeyên me ne. Lê belê li vê derê ne dar hiştin ne jî şênkahî. Ji bo pêşî li vê talanê bigirin û nehêlin êdî dar bêne birîn em îro hatin vê derê, tevlî çalakiya nobedê bûn. Em ê rojekê bimînin, lê belê eger ji me re bê gotin ku mehekê jî bimînin, em ê bimînin. Ji van daran em ê her tiştî bikin.”
BÛ DENGÊ CÛDÎ Û BESTA!
Ayşe Akar bi stranan xemgîniya xwe ya ji ber birîna daran nîşan da û got, “Piştî ku hatim vê derê û min dît ku dar hatine birîn, ez gelekî êşiyam. Niha jî rondik ji çavên min diherikin. Min ew rondik ber bi nava xwe ve herikand. Ev dar em in, eger dar nebe em ê jî nebin, em ê winda bibin. Dijmin tê ewqas darên me yên hêja dibire, yên ku dijminê mirov û xwezayê ne daran dibirin. Em bi her awayî dilsozê vê xakê ne. Ji ber vê yekê divê em xwedî li vê xakê û daran derkevin.”
‘NIKARIN ME BIQEDÎNIN’
Ayşe Akar di dawiya axaftina xwe de destnîşan kir ku wê têkoşîna xwe ya ji bo daran dewam bikin û bi stranên xwe yên ji bo Cûdî û Bestayê bû dengê darên hatin birîn.
Ayşe Akar got, “Ne dikarin me Kurdan ne jî dikarin van daristanan biqedînin. Ji bo pêşîgirtina li vê talanê em ji malên xwe hatin. Piştî dîtina vî dîmenî çi ji destê me bê em ê bikin. Ji bo parastina darên xwe em neçar in têbikoşin. Divê canê hîn bêhtir daran neşewite.”
