Li girtîgehên Tirk nêzî 2 hezar û 500 girtiyên siyasî yên Rojavayî û Rojhilatî hene. TUHAY-DER’ê bal kişand ser rewşa girtiyên ku sûdê ji mafên xwe yên hiqûqî wernagirin, nikarin bi malbatên xwe re hevdîtinê bikin û parêzer jî nikarin pê re hevdîtinê bikin.
Hevserokê TUHAY-DER’ê yê Wanê Çetîn Ûyar ji ANF’ê re axivî û got, “Malbatên Rojavayî û Rojhilatî nikarin xwe bigihînin zarokên xwe. Ji ber ku wasî ji zarokên xwe re nedîtine, nikarin biçin serdanê jî. Ji ber ku belgeya rayeyê nîne, em nikarin xwe bigihînin hevalên xwe yên girtîgehê. Piranî di hucreyên yekkesî de tên ragirtin. Di hucreya yekkesî de tenê xwarina wan tê dayîn, pêdiviyên wan ên din nayên pêşwazîkirin.”
‘SIRGÛNÎ BAJARÊN ROJAVA TÊNE KIRIN’
Ûyar diyar kir ku bi taybetî cezayê hepsê yê muebetê li van girtiyan hatiye birîn; li şûna girtîgehên li Wan, Amed û Mêrdînê sirgûnî girtîgehên li bajarên rojavayê Tirkiyeyê hatine kirin û ev tişt got: “Şert û mercên ekonomîk û ragihandinê nahêle malbat xwe bigihînin wan. Em dixebitin ji bo ku ev girtî bibin xwedî derfetên hiqûqî. Yek ji xebatên me ya din jî piştevaniya bi van girtiyan re ye. Derfetên wan tune ne, cil û berg û pêlavên wan nînin. Em bang li Wezareta Edaletê û Komîsyona Lêkolînê ya Meclîsê dikin; ji bo em bikarin alîkariyê bidin girtiyên di vê rewşê de, astengiyan rakin. Pêlava girtiyên Rojavayî û Rojhilatî jî nîne.”
