Li gelek navendên Ewropayê jinan bi boneya 25’ê Mijdarê Roja Têkoşîna li dijî Tundiya li ser Jinan a Navnetweyî daketin qadan.
FRIEDRICHSHAFEN
Li bajarê Friedrichshafen ê Elmanyayê jinên Kurd û Elman bi boneya 25’ê Mijdarê Roja Têkoşîna li dijî Tundiya li ser Jinan a Navnetweyî li cihê herî qelebalix a bajêr kon vedan.
Jinan bi sedan danezan belav kirin û diyar kirin ku tundiya li ser jinê polîtîk e. Di axaftinan de hate destnîşankirin ku têkoşîna azadiyê ya jinên Kurd îlhamê dide jinên cîhanê û ev peyam hate dayîn: “Ji xwişkên Mîrabel heta Sakîna Cansiz em dikarin bi berxwedaneke xurttir li dijî her curê tundiyê bisekinin.”
FREIBURG
Li bajarê Freiburg ê Elmanyayê bi banga saziyên cuda û Meclîsa Jinê ya Nûda meş û mîtîng hate lidarxistin. Li ser navê Meclîsa Jinê ya Nûda danezan hate xwendin. Di danezanê de bal kişandin ser tecrîda li ser Rêber Apo ku mîmarê Têkoşîna Jinên Kurd e. Di meşê de tim û tim dirûşmeya “Jin, Jiyan, Aadî” hate berzkirin.
STOCKHOLM
Li paytexta Swed Stockholmê, Meclîsa Jinê ya Amara û Yekîtiya Jinên Rojhilat (RONAK) bi boneya 25’ê Mijdarê Roja Têkoşîn û Piştevaniya Navneteweyî ya li dijî Tundiya li ser Jinê çalakiyek li dar xistin.
Çalakiya li Qada Sergels Torg ji bo hemû jinên hatin qetilkirin bi deqîqeyek rêzgirtinê dest pê kir. Di çalakiyê de wêneyên Sakîne Cansiz, Leyla Şaylemez, Fîdan Dogan, Evîn Goyî yên li Parîsê hatin qetilkirin, Sêvê Demîr, Pakîze Nayir, Fatma Uyar ên di berxwedana xwerêveberiyê de hatin qetilkirin, Gulîstan Tara, Hêro Bahadîn, Nagîhan Akarsel ên ji aliyê faşîzma Tirk ve hatin qetilkirin, Şîrîn Elemhulî ya bi awayekî hovane hate qetilkirin û Werîşe Mûradî, Pexşan Ezîzî û Zeyneb Celaliyan ên li zindanên Îranê derbarê wan de biryara darvekirinê hatiye dayîn û dowîza bi nivîsa “Jin, Jiyan, Azadî” hatin hilgirtin.
Li ser navê Yekitiya Jinên Kurd a Skandînavyayê (YJK-Skandînavya) Ayşe Dîdar axaftinek kir û got: “Em weke jinên Kurd ne tenê di hin rojên diyar ên salê de, her kêlî, her roj di nava têkoşînê de ne. Ev têkoşîna ku em dimeşînin roj bi roj mezintir dibe û dewam dike. Rêber Apo fêrî me kir ku azadî, têkoşîn û rêxistinbûn çi ye. Ya herî girîng nîşanî me da ku em çawa xwe biparêzin.”
Ayşe Dîdar anî ziman ku êdî dem hatiye ku ew bi hev re xwe birêxistin bikin û wiha got: “Em xwe birêxistin bikin û dengê xwe bilind bikin û bi hev re têbikoşin. Ev ne tenê têkoşîneke kesî ye, divê bi awayekî kolektîf li ber xwe bidin.”
Nûnera KJAR’ê jî bal kişand ser pêkanînên li dijî jinên Kurd ên li Îranê û wiha got: “Li Îranê zilm li çalakvanên jin ên Kurd tê kirin û tên darvekirin. Ev yek piştî qetilkirina Jîna Emînî eşkere bû. Tevgera Azadiya Kurd azadiya jinê weke mifteya civakeke wekhev û adil dibîne. Îro ji ber beşdarbûna çalakiya ‘Jin, Jiyan, Azadî’ cezayê darvekirinê li gelek jinan hate birîn. Ji bo vê jî divê em dengê jinên girtî yên li Îranê li her derê bidin bihîstin. ‘Jin, Jiyan, Azadî’ felsefeya jiyanê û mekanîzmaya xweparastinê ya me hemû jinan e.”
Çalakî ji aliyê kesên derdor ve rastî eleqeyekî mezin hat û bi dirûşmeya “Jin, Jiyan, Azadî” bi dawî bû.
LINZ
Li bajarê Linz ê Awûstûryayê bi boneya 25’ê Mijdarê Roja Têkoşîna li dijî Tundiya li ser Jinan a Navnetweyî meş û mîtîng hat lidarxistin.
Çalakiya li Martîn Luther Platzê ku yek ji qadên herî qelebalix ên Linzê ye bi meşekê dest pê kir û veguherî mîtîngê.
Li ser navê Platforma Jinan a Rosayê Rîta Seîlmann axivî û diyar kir ku di sala dawî de li Awûstûryayê 27 jin hatin qetilkirin û ev yek encama nêzîkatiya zayendperest a dewletê ye.
Jinên ku rastî destdirêjî û tundiya fizîkî hatine di mîtîngê de axivîn. Jinan serpêhatiyên xwe vegotin û bal kişandin ser girîngiya hêz û hevgirtina berxwedana jinan a li dijî tundiyê.
Nûnera Projeya Stop Evelyn Rotauer qala xebatên xwe yên ji bo pêşîlêgirtina tundiya hevjîn, nav malê û qetilkirina jinan kir.
Çalakî bi berzkirina dirûşmeya “Jin, Jiyan, Azadî” bi dawî bû.
VIYANA
Li paytexta Awûstûrya Viyanayê bi boneya 25’ê Mijdarê Roja Têkoşîna li dijî Tundiya li ser Jinan a Navnetweyî meşek hat lidarxistin. Meş bi pêşengiya Rêxistina Jinan a Avesta, Rosa û gelek rêxistinên jinan pêk hat û bênavber dirûşmeya “Jin, Jiyan, Azadî” berz kirin.
Girseya ku li semta Handelskaî ya Viyanayê kom bû, peyama têkoşîna hevpar a ji bo mafên jinan û azadiya jinan da.
Li ser navê Rêxistina Jinan Avesta Nurcan Guleryuz axivî û bal kişand ser kuştina jinan û sûcên tundiyê yên li Tirkiye û Kurdistanê diqewimin û wiha got: “Zilm, êşkence û darvekirina jinên têkoşer ên Kurd ên li Rojhilatê Kurdistanê parçeyek ji van polîtîkayên tundiyê ne. Azadiya jinê mifteya civakeke adil û azad e. Di navenda vê têkoşînê de felsefeya Rêberê Tevgera Azadiya Kurd Abdullah Ocalan heye. Têkoşîna Abdullah Ocalan a ji bo azadiya jinê bingeha xweparastin û berxwedanê ye.”
Di axaftinan de tundiya li ser jinê hat şermezarkirin û peyama ku ti jin bi tenê nîne hat dayîn. Platformên jinan bal kişandin ser girîngiya yekîtî û berxwedana hevpar a li dijî tundiyê.
LOZAN
BIEL
CENEVRE
