Di 29’emîn salvegera çalakiya fedaî ya şehîd Zîlan (Zeyneb Kinaci) de, li bajarên cuda yên Rojava çalakiyên bîranînê hatin lidarxistin. Di çalakiyan de têkoşîna şehîd Zîlan wekî sembola têkoşîna azadiya jinan hate binavkirin.
HESEKÊ
Di 29’emîn salvegera çalakiya fedaî ya şehîd Zîlan (Zeyneb Kinaci) de, Meclîsa Jinan a Tevgera Civaka Demokratîk (TEV-DEM) li bajarê Hesekê navendek vekir. Rêxistin, sazî û partiyên siyasî yên jinan beşdarî vekirinê bûn.
Merasîma vekirinê bi deqeyeke rêzgirtin dest pê kir. Piştre, Cîgira Meclîsa Jinan a TEV-DEM’ê Şêrîn Hesen axivî û berxwedana şehîd Zîlan silav kir.
Berdevka Meclîsê Nûrşan Ferho, jî destnîşan kir ku şehîd Zîlan ji bo tevahiya jinan pêşeng û parêzvana xeta azadiya jinê ye.
Vekirina navendê ji hêla Ezîza Izo, dayika Şehîd Dijwar ve hate kirin.
TIL TEMIR
Bi heman wesîleyê, şehîd Zîlan li bajarê Til Temir ê Kantona Cizîrê ya Herêma Bakur û Rojhilatê Sûriyeyê jî hate bîranîn. Di çalakiya ku bi pêşengiya Kongra Star hate lidarxistin de, çalakî û peyama şehîd Zîlan hatin xwendin. Rêvebera Kongra Star Nûhat Şindî, diyar kir ku divê peyama şehîd Zîlan ji hêla jinên ciwan ve bêtir were xwendin û fêmkirin.
Di çalakiyê de, ji bo bîranîna şehîd Zîlan ji aliyê Navenda Çand û Hunerê ya Demokratîk a Til Temirê ve stran hatin gotin.
