Li bajarên Bakurê Kurdistanê û Tirkiyeyê êrîşên çeteyên girêdayî hikûmeta demkî ya Sûriyeyê li ser taxên Şêxmeqsûd û Eşrefiyê yên Helebê hatin protestokirin.
STENBOL
DEM Partî ya Stenbolê li ber avahiya Bahçelîevlerê daxuyanî da çapemeniyê û êrîşên li ser Kurdên li Helebê protesto kirin. Di çalakiyê de pankarta “Parastina Rojava parastina mirovahiyê ye. Rojava wijdan, azadî, berxwedan e; nikarin teslîm bigirin” hat hildan. Di daxuyaniyê de dirûşmeyên “Bijî berxwedana Rojava”, “Rojava ya me ye, rûmeta me ye”, “Bijî berxwedana Şêxmeqsûd”, “Jin, jiyan, azadî” û “Şehîd namirin” berz kirin.
Hevserokê navçeya Bahçelievlerê Ahmet Sûbaşi diyar kir ku gelên li Rojava bi hev re dijîn û got, “Em qirkirina li Helebê ya li dijî Kurdan hatiye destpêkirin qebûl nakin. Rojava Amed e, Wan e.”
Endama PM’ê Gonca Yangoz jî bi bîr xist ku Şoreşa Rojava şoreşa jinan e û got, “Em jin her roj li qadan e û li ber xwe didin. Dayikên Aştiyê ji bo dengê aştî û hevgirtinê bilind bikin wê ji Tirkiye û Kurdistanê biçin Enqereyê.”
Hevseroka Stenbolê Çinar Altan diyar kir ku berxwedana gelê Kurd ne tenê ji bo taxên wan e, di heman demê de têkoşîna ji bo Rojhilata Navîn e.
SÊRT
Li Sêrtê ji bo protestokirina êrîşên li ser Şêxmeqsûd û Eşrefiyê meşiyan. Di meşa ku li taxên Çakmak û Dogan ên navenda bajêr pêk hat de, fîşekên hewayî hatin teqandin û dirûşmeyên “Bijî berxwedana Rojava” û “Rojava xeta me ya sor e” hatin berzkirin.
AMED
Platforma Saziyên Demokratîk li sê navçeyên Amedê ji bo protestokirina êrîşan daketin kolanan.
Li navçeya Farqînê li ber avahiya qeymeqamtiyê daxuyaniyek girseyî hat dayîn. Di daxuyaniyê de dirûşmeyên “Bijî berxwedana Rojava” û “Em ê bi berxwedanê bi ser bikevin” hatin berzkirin. Rêveberê DEM Partiyê Niyazî Soner banga hevgirtinê kir û got, “Ev banga me ji bo hemû gelên cîhanê ye. Li kêleka gelê Kurd ên cîhanê rizgar dikin rawestin.”
Rêxistinên DBP û DEM Partî yên Xana Axparê li ber avahiya DBP daxuyanî da çapemeniyê. Hevseroka DEM Partiyê Ayşe Ay diyar kir ku şerê li Helebê bi taybetî jin û zarokan hedef digire û got, “Ew ji hebûna gelê Kurd ditirsin. Em ê hebûna xwe bidomînin.” Hevserokê DBP’û Mehmet Şîrîn Demîr êrîş şermezar kir û diyar kir ku tiştê ku diqewime sûcek li dijî mirovahiyê ye.
Endamên DEM Partiyê li kolana Bajêr a Bismilê kom bûn û bi vêxistina meşale êrîşên li ser Helebê protesto kirin. Di çalakiya ku dirûşm hatin berzkirin de nûnerên partiyên siyasî, rêxistinên civaka sivîl û gelek welatî beşdar bûn. Hevserokê DEM Partiyê Cemil Tekînoz di çalakiyê de axivî û got, “Em êrîşên dermirovî yên li ber çavên cîhanê li dijî gelê me yê li Helebê tên kirin şermezar dikin.”
Piştî daxuyaniyê, polîsan bi guleyên plastîk êrîşî girseyê kir, herî kêm du kes hatin binçavkirin.
Di çalakiyê de dirûşmeyên “Bijî Serok Apo”, “Bijî berxwedana Rojava” û “Ciwan ranezên, xwedî li Rojava derkevin” hatin berzkirin.
EDENE
Li ser banga Platforma Saziyên Demokratîk a Edeneyê, gelên navçeyên Ceyhan û Yuregirê di bin baranê de êrîş û sûcên li dijî mirovahiyê yên li Helebê protesto kirin.
Bi sedan kes li ber avahiya muxtariya taxa 19 Mayisê ya navçeya Yuregirê kom bûn û bi pankartên “Rojava xeta me ya sor e” û “Em ji mirinê mezintirin – Rojava defend” meşiyan. Girse bi qasî 5 kîlometreyan di nav taxên Koza, Anadolû, Yamaçli û Yûnûs Emre geriyan û heta ber avahiya DEM Partî ya Yuregirê meşiya. Di daxuyaniyê de êrîşên li ser taxên Şêxmeqsûd û Eşrefiyê hatin protestokirin.
Li ser banga Platforma Saziyên Demokratîk a Edeneyê, tevî barana zêde gel li Ceyhanê meşiyan. Girseya bi dirûşmeyan ji taxa Belediyeevlerî heta qada Orhan Kemal a li taxa Kuçukkirimê meşiyan
Piştî meşê, hevserokê DEM Partî yê Ceyhanê Tahir Ozdemîr axivî û êrîş û komkujiyên li Helebê şermezar kir.
Çalakiyên li her du navçeyan bi berzkirina dirûşmeyan bi dawî bûn.
