Li gorî agahiyên ku ANHA’yê bi dest xistine, hêzên Hikûmeta Demkî ya Sûriyeyê û komên çekdar ên nenas li gundewarê rojavayê Humsê, bi taybet jî li gundê Mutearid bi dehan welatî binçav kirin. Wê yekê di nava şêniyan de metirsî çêkir.
Li gorî çavkaniyên xwecihî, komên çekdar û hêzên hikumetê zêdetirî 50 ciwan û kalemêrên ji malbatên Ebûd, Xerfan û Şehod û hwd ên ji heman gundî binçav kirin.
Di agahiyan de hat destnîşankirin ku di serdegirtin û veguhastina binçavkiriyan de, êşkence li welatiyan hat kirin. Wê yekê hişt ku malbat ji aqûbeta wan bitirsin.
Heman çavkaniyan anî ziman ku ji ber qutbûna înternetê şênî nikarin têkiliyê bi aliyên hiqûqî û saziyên ragihandinê re bikin. Li kêlek wê jî piranî ciwanên gund reviyan nava zeviyên derdorê.
Kesên hatine binçavkirin ev in: Ebduletîf Salih Ebûd, Hanîn Ebduletîf Ebûd û hevjîna wî, Fîras Ebduletîf Ebûd, Wîsam Silêman Ebûd, Mihemed Silêman Ebûd û Beşar Hermoş.
Şêniyan bang li dezgehên ragihandinê û rêxistinên hiqûqî kir ku demildest tev bigirin û rastiya heyî veguhêzin, li ser aşkerakirina cih û aqûbeta binçavkiriyan bixebitin.
