Meclisa Malbatên Şehîdan a Dêrikê merasîma cenaze ya fermandarê Tîmên Operasyona Leşkerî (TOL) yên girêdayî QSD’ê şehîd Gênco Gundik (Abdullah Remedan) û şervanê QSD’ê şehîd Serbest Girê Spî (Mihemed Reşîd) ên 18’ê Çileya îsal li ser rêya Reqa-Ebyed şehîd bûne, li dar xist.
Şêniyên Dêrik, Girkê Legê û Çilaxayê beşdarî merasîmê bûn. Girse cenazeyên her du şehîdan ji pêşiya Nexweşxaneya Şehîd Hogir wergirtin û bi karwanekî ber bi Pakrewangeha Şehîd Xebat ve çûn. Li pakrewangehê karwanê cenazeyê bi dirûşmên dilsoziya bi şehîdan re hat pêşwazîkirin.
Merasîmê bi deqeyeke rêzgirtin û torana leşkerî dest pê kir. Pişte ji endamê Fermandariya Giştî ya QSD’ê Luqman Xelîl axivî. Luqman diyar kir ku şehîdan rêya azadiyê ronî kirin û got: “Navên xwe di dîrokê de neqişandin. Bi keda wan hebûn, nasname û îradeya me hatin parastin. Sekna me ya li vir bi saya fedakariyên şehîdan e. Ji bo em bi azadî û rûmetî bijîn rêya berxwedanê hilbijartin.”
Luqman Xelîl di dawiya axaftina xwe da soza domandina rêya şehîdan da.
Ji rêveberên Meclisa Malbatên Şehîdan a Dêrikê Mihemed Cemîl jî anî ziman ku gelê herêmê bê teredudu welatê xwe diparêzin û ji bo parastina gelan berdêlên giran tên xwestin.
Serokê Hevgirtina Al El Beyet a Dêrikê Şêx Sînan Dêrşoy jî bal kişand ser keda şehîdan di avakirina welatan de û diyar kir ku gelê Rojava destekftiyên tevahî gelan parastin û çeteyên DAIŞ’ê têk birin.
Di dawiyê de wesîqeyên her du şehîdan hatin xwendin û radestî malbatên wan hatin kirin. Cenazeyên şehîdan bi tilîliyên dayikan û dirûşman veşartin.
