Hat eşkere kirin ku li Îngilîstan û Gallerê, tenê di ji sedî 3’yê bûyerên xwekuştinê yên girêdayî tundiya nav malê de pêvajoya zagonî hatiye destpêkirin.
Li gorî daneyên Konseya Serokên Polîsan a Neteweyî, di navbera salên 2020-2025’an de, di têkiliyên ku gumana tundiyê tê de hebû 553 kesan dawî li jiyana xwe anî, lê ji van bûyeran tenê derbarê 17’an de piştî mirinê doz hate vekirin.
Hejmarên hatine eşkere kirin, sala sêyemîn e li pey hev nîşan didin ku dibetiya xwekuştina kesên di nav têkiliyeke tundûtûj de ne, ji dibetiya ku ew ji aliyê partnerên xwe ve werin kuştin zêdetir e.
Lêkolînên ku ji aliyê The Guardian ve hatine meşandin jî nîşan didin ku hevjînên jinên ku piştî tundiyeke demdirêj a nav malê xwekuştine, piraniya caran ji aliyê polîsan ve nayên lêpirsîn kirin.
Di meha Adarê de, Lee Milne bû kesê yekem ku bi sûcdariya “bi rêya tundiya nav malê bûye sedemê ber bi xwekuştinê” hate mehkûm kirin. Di doza ku li Skotlandê hate dîtin de, jûriyê Milne bi “kuştina bêqest” sûcdar dît. Lê belê li Îngland û Gallerê di bûyerên wekhev de hîna mehkûmiyeteke ku bi biryara jûriyê bi dawî bûbe tune ye.
Rayedar diyar dikin ku di gelek bûyeran de gumanbar nayên lêpirsîn kirin an jî dosyayên heyî piştî mirina qurbaniyan bêyî hincet tên girtin.
Komîsera Tundiya Nav Malê ya Îngilîstan û Gallerê Nicole Jacobs got ku di navbera hêzên ewlehiyê de cudahiyên cidî yên pêkanînê hene û li hinek herêman lêpirsîn bi têra xwe kûr nayên meşandin. Jacobs bal kişand ku ji ber vê yekê lêgerîna malbatan a ji bo dadê gelekî zor bûye.
Nicole Jacobs destnîşan kir ku kêmasiya çavkanî û kapasîteyê, ligel kontrolkirina vegotina bûyerê ji aliyê sûcdaran ve, lêpirsînan qels dike. Jacobs diyar kir ku di hinek rewşan de destûra berdewamiya gihîştina gumanbaran a ji bo telefonên qurbaniyan, dibe sedema windakirina delîlên krîtîk.
Her wisa Jacobs da zanîn ku xizmên qurbaniyan di lêgerîna dadmendiyê de rastî “piyangoya koda posteyê” tên û kêmketina hejmara dozan wek “metirsiyeke mezin” bi nav kir.
Li aliyê din, hinek aktîvîst bang dikin ku “sedembûna kesekî ber bi xwekuştinê bi rêya tundiya nav malê” wek sûcekî serbixwe di zagonan de cih bigire. Rayedar jî balê dikişînin ser hewcedariya lezgîn a pêkanîna bi bandortir a zagonên heyî û bilindkirina qalîteya lêpirsînan.
