Li bajarê Kobanê ji ber qutbûna avê, gel neçar dimîne ku ava bîran vexwe û ji ber ku ava bîran, ne aveke pir baş e dibe sedema gelek nexweşiyan. Li Kobanê hejmara kesên ji ber ava nepaqij nexweş dikevin zêde dibe.
Ji ber dorpêça giran ya li ser bajarê Kobanê, hemû pêdiviyên sereke yên weke av, ceyran û sotemeniyê li ser bajêr hatine birîn. Gel neçar dimîne bi jenaretoran avê ji bîran derxîne û wê avê vexwe. Lê belê ew av jî ne taqîmkirî ye û ne li gorî ava giştî ye. Ji ber wê jî rêjeya nexweşiyê li Kobanê gelekî bûye. Li gorî bijîşkên nexweşxaneya Kobanê, rojane herî kêm 200 kes ji ber nexweşiyê seredana nexweşxaneyê dikin ku piraniya wan zarok in.
ÊDÎ DERMAN NAYÊN PEYDAKIRIN
Dayîka bi navê Xewle Ehmed Mehmûd ku zarokê wê nexweş bûye, diyar kir ku ew li dermanî digerin, nikarin peyda bikin û ev yek anîn ziman: ‘’Du sê nexweşî li gel zarokê min peyda bûne. Em li derman digerin, derman peyda nabe, li hin dermanxaneyan peyda dibe ku ew jî gelekî buha tê firotin. Li ser me dorpêç heye û her ku diçe nexweşî jî zêde dibin. Piraniya zarokan nexweş e û şîr peyda nabe. Em dixwazin êdî ev dorpêç demildest rabe.”
Welatiya bi navê Zirîfe Mihemed ku nexweşiya rebo, dil, şekir û tansiyonê ye, anî ziman ku mala wê li Reqayê bû, wê koçî bajarê Kobanê kiriye û got: ‘’Jiyana me bi koçberkirinê re derbas bûye, mal û milkê me li bajarê Reqayê bû. Malê me hemû hate dizîn, ez jî nexweş im. Dermanên me jî peyda nabin, ev du roj in li ez li nexweşxaneyê me. Di van du rojan de dermanê ku tên peydakirin em tînin û yên ku nayên peydakirin em nabînin. Kobanê niha jî dorpêçkirî ye û her der hatiye girtin. Em weke kesên nexweş bang li cihê peywendîdar dikin ku êdî bi erka xwe rabin.”
