Wezîre Parastinê ragihand ku êriş roja Pêncşemê li cihekî nêzî sînorê Venezuelayê pêk hat û ELN bi zimanekî tund şermezar kir. Li gorî rayedaran, di êrişa dawî de ku bi balafirên bêmirov û teqemeniyan hate kirin, herî kêm 6 leşkeran jiyana xwe ji dest dan, 28 leşker jî birîndar bûn. Hejmara wezîfedarên ewlekariyê yên di nava hefteyekê de di êrişên gerîlayan de mirin bû 8 kes.
Li gorî artêşê teqîn li herêma Cesar a li bakurê welêt, li navendeke tabûra leşkerî ya li bejahiyê rû da. Ji roja Yekşemê û vir ve ELN’ê 82 êriş û sabotaj kirin.
ELN ku nêzî 5 hezar û 800 endamên xwe hene û li 20 ji sedî yê şaredariyên li Kolombiyayê kar dike, yek ji rêxistinên herî mezin ên serhildêr ên çekdarî yên welêt tê pênasekirin.
ELN’ê di navbera rojên Yekşem û Sêşemê de li herêmên ku kontrol dike ji bo sê rojan “Derketina derve qedexe kir” û daxuyaniyên Serokê DYE’yê Donald Trump ji bo vê yekê weke hincet nîşan da ku Trump bêyî nîşandana delîlan herêm weke laboratûwara narkotîkê nîşan da û qala destwerdaneke leşkerî ya gengaz kir.
Li gorî daneyên Wezareta Parastinê di navbera Çile û Îlonê de li Kolombiyayê hejmara leşker û polîsên ji aliyê komên çekdar ve hatin kuştin gihîşt 146 kesî. Ev hejmar li gorî par tê wateya zêdebûna ji sedî 128’an.
Serokdewlet Gustavo Petro ji sala 2022’an dema dest bi wezîfeyê kir û vir ve hewl da bi ELN’ê re hevdîtinên aştiyê bike, lê belê pêvajo bê encam ma.
Meha Çileyê li nêzî sînorê Venezuelayê piştî ku ELN’ê zêdeyî 100 kes kuşt, muzakere bi temamî sekinîn.
