Li gorî daxuyaniya Fîloya Kolombiyayê êrîş li ser sînorên şaredariya Buenaventura ya li başûrrrojavayê welêt li dijî keştiya leşkerî ya li ser Çemê Nayayê pêk hatiye.
Di encama êrîşê de leşkerekî û du berbazan jiyana xwe ji dest dane û 4 leşker jî birîndar bûne ku tedawiya wan berdewam dike. Di daxuyaniyê de hate ragihandin ku êrîş ji aliyê Navenda Serkana Giştî ya Leşkerî (EMC) ve hatiye kirin ku EMC şaxeke gerîlayên FARC’ê ye û di sala 2016’an de peymana aşitiyê ya hatibû îmzekirin, red kiribû.
Ji peymana aşitiyê heya niha li Kolombiyayê ji ber komên çekdarî gelekî şer û tundî pêk tên.
Serokdewletê çepgir Gustavo Petro, armanc dike şer û pevçûnên ku zêdetirî şêst salî ye berdewam dike, bi dawî bike û li gel komên gerîlayên çalak hevdîtin pêk dianîn. Lê belê serokê EMC’ê Ivan Mordisco piştî hevdîtînên ku salekê berdewam kirin, di sala 2024’an de ji hevdîtinan vekişiya.
Di gel ku di demên dawîn de êrîşên gerîlayan ên bi dronan zêde bûne di heman demê de ji ber van êrîşan gelek kes jiyana xwe jî ji dest didin. Komîteya Xaçasor a Navneteweyî diyar dike ku ev çek bi awayekî zêde têne bikaranîn.
