Berî ku kampanyaya çalakiyê ya cîhanî ya ji bo Rojava bi dawî bibe, li paytexta Kolombiyayê Bogotáyê, li gorî bangewaziya “Riseup 4 Rojava” û “Women Defend Rojava”, gelek rêxistinên civakî, pêkhateyên femînîst, sendîkayên karkeran û komeleyên xwendekaran ên li bajêr bi awayekî kolektîf û têkoşerane “Roja Piştgiriyê” li dar xistin da ku piştgiriya xwe nîşan bidin.
Di 30’ê Çileyê de li Zanîngeha Pedagojiyê kom bûn çêbû. Li wir nîqaşeke agahdarkirinê li ser rewşa heyî ya Rojava hate kirin. Beşdaran piştî ku pirsên xwe li ser pêşkeftinên nû kirin, li ser Peymana nû ya Rêveberiya Xweser nîqaş kirin. Piştî nîqaşê, atolyeyeke dansa gelêrî ya Kurdî hate lidarxistin ku tê de beşdaran dansên kevneşopî yên Kurdistanê fêr bûn û pêşkêş kirin.
Piştî atolyeya dansê, beşdaran pankarteke mezin amade kirin ku li ser wê ev nivîs hebûn:
“Bi şoreşa jin û gelan re Abya Yala li kêleka Rojava ye; Kobanê û Rojava li ber xwe didin!”
Piştî wê, ji Zanîngeha Pedagojiyê heta Konsolosxaneya Tirkiyeyê meşeke protestoyê hate kirin. Beşdaran li ber Konsolosxaneyê kom bûn û daxuyanî xwendin ku êrîşên leşkerî û siyasî yên dewleta Tirk ên li ser Heleb û Rojava şermezar dikin. Deriyên konsolosxaneyê bi van sloganan hatin boyaxkirin: “Jin, Jiyan, Azadî” û “Bijî Berxwedana Rojava!”
Piştî wê, beşdaran li derdora qada çalakiyê ji kesên derbas dibin û niştecihên taxê re belavok belav kirin ku di derbarê rewşa Rojava de agahî parve bikin. Piştî axaftinan, çalakiyeke çandî hate lidarxistin. Komek li ber Konsolosxaneyê dansên gelêrî yên Kurdî û yên Abya Yala pêşkêş kirin, komeke din jî li ser erdê li ber konsolosxaneyê nivîseke mezin xêz kir. Di nivîsê de ev gotin hebûn:
“Ji Abya Yala’yê em Kobanê diparêzin, em Rojava diparêzin, em jiyanê diparêzin!”
Di daxuyaniya çalakiyê de ev tişt hatin gotin: “Bi vê çalakiyê em êrîş û planên tunekirina dewleta Tirk, hikûmeta demkî ya Sûriyeyê û çeteyên HTŞ’ê yên li dijî gelê Kurd û gelên din ên di Rêveberiya Xweser a Bakur û Rojhilatê Sûriyeyê de dijîn şermezar dikin. Em wek jin û gel dengê xwe bilind dikin; em rola DYA’yê, Yekîtiya Ewropayê û Brîtanyayê di vê qirkirin û dagirkeriyê de jî şermezar dikin.”
Di dawiya çalakiya hunerî de daxuyaniya hevpar bi van gotinan bi dawî bû: “Em bi şoreşa Rojava re û bi gelê Kurd re yê ku her roj li dijî êrîşên emperyalîzmê, tundiya dewletê û fundamentalîzmê li ber xwe dide di nava piştgiriyê de ne. Em wek gelên Abya Yala şer red dikin û em dibêjin ku tu gel bêyî ku hemû gel azad bibin azad nabe. Em ji Bogotá, Kolombiyayê bang dikin: Bijî Şoreşa Rojava!”
