Bi wesîleya Komploya Navneteweyî ya 15’ê Sibatê li dijî Rêber Apo, li gelek bajarên Kurdistan û Tirkiyeyê çalakiyên protestoyî hatin lidarxistink
ÊLIH
Bi pêşengiya DEKUP’ê bi minasebeta salvegera komploya navneteweyî ya li dijî Rêber Apo li Êlihê bi ronahiyên feneran meş hat lidarxistin. Parlamenterê DEM Partiyê yê Mêrdînê Kamuran Tanhan, gelek sazî, dezgeh û bi sedan kes li Cadeya Gulîstanê kom bûn û bi pankarta “Bi ronahiya heqîqetê ber bi azadiyê ve” heta ber bi avahiya Partiya Wekhevî û Demokrasiyê ya Gelan (DEM Partî) a li Xaçerêyê meşiyan. Di dema meşê de tim dirûşmeyên “Jin Jiyan Azadî”, “Bijî Berxwedana Îmrali”, “Silav silav ji Îmraliyê re hezar silav” û “Bijî Serok Apo” hat berzkirin.
Girseya ku gihîşt ber avahiya DEM Partiyê ya Êlihê daxuyanî hat dayîn. Ewilî Hevserokê TUHAY-DER’ê yê Êlihê Hasan Arigtekîn daxuyaniyê xwend.
‘SIYASETA ÎNKARÊ BI ÎRADEYA ABDULLAH OCALAN TÊK ÇÛYE’
Hasan Arigtekîn diyar kir ku ev plana tarî li hember îradeya azadiyê ya gel û biryardariya çareseriyê ya Rêber Apo a li Îmraliyê nîşan da û têkçûyînek dîrokî xwariye û wiha got: “Gelê Kurd û hevalbendên wan ji bo pûçkirina vê komployê bedelên giran dane. Bi çalakiyên ‘Hûn Nikarin Roja Me Tarî Bikin’, ji bo parastina Rêber Abdullah Ocalan çembera agir çêbû û bi mîlyonan kes li meydan û girtîgehan li ber xwe dan û nehiştin ku komplo bi bedelên mezin bi ser bikeve. Siyaseta înkar û tunekirinê bi îradeya Abdullah Ocalan têk çûye. Navnîşan û îradeya çareseriyê diyar e. Ji ber vê divê tavilê azadiya rêzdar Ocalan bê misogerkirin.”
‘GELÊ KURD LI DIJÎ ÎNKARÊ SED SAL E LI BER XWE DIDE’
Piştre Parlementerê DEM Partiyê yê Mêrdînê Kamuran Tanhan axivî û diyar kir ku gelê Kurd sed sal e li dijî polîtîkayên înkar û îmhayê li ber xwe dide û wê li ber xwe bide. Kamuran Tanhan wiha pê de çû: “Em vê roja reş şermezar dikin. Armanca vê komployê tunekirina gelê Kurd bû. Lê îro, gelê Kurd bi milyonan li her çar perçeyên Kurdistanê radibe ser piyan û îradeya xwe nîşan dide. Dema hûn li Rojava, Başûr, Bakur û Rojhilatê binêrin, hûn ê hebûna gelê Kurd bibînin.”
Daxuyanî bi dirûşman ve bi dawî bû.
MÊRDÎN
Platforma Saziyên Demokratîk di salvegera komploya navneteweyî li navenda Mêrdîn, û navçeyên Artûklû, Qoser, Dêrik, Şemrex, Kerboran û Nisêbînê çalakiyên nerazîbûnê hatin lidarxistin û komplo hat şermezarkirin.
Hezaran welatiyên li Qada Azadiyê ya navçeya Qoserê hatin cem hev, dirûşmên “Bijî Serok Apo” û “Bê Serok jiyan nabe” berz kirin û daxuyanî dan. Daxuyaniyê Parlamentera DEM Partiyê ya Mêrdînê Berîtan Guneş Altin xwend diyar kir ku Komplo têkoşîna ciwan, jin, têkoşerên ‘Hûn nikarin Roja me tarî bikin’ û Rêberê Gelê Kurd Abdullah Ocalan vala hat derxistin.
Piştî daxuyaniyê welatî bi dehan çirayên hêviyê ber bi esman ve firandin. Çalakî bi berzkirina diruşman bi dawî bû.
RIHA
27’emîn salvegera komploya navneteweyî ya li dijî Rêberê Apo, li bajarê wî Rihayê hat protestokirin. Bi pêşengiya Platforma Saziyên Demokratîk, girseya ku li Qada Topçu ya li navçeya Xelîliyê kom bû, bi pankarta “Em komploya navneteweyî ya 15’ê Sibatê şermezar dikin! Bi ronahiya heqîqetê ber bi azadiyê ve” dest bi meşê kir. Welatiyan roniyên telefonên xwe pêxistin û bi dirûşmên “Bijî Serok Apo” û “Bi can bi xwîn em bi te re ne ey Serok” meşiyan.
‘SIYASETA ÎNKARÊ BI ÎRADEYA RÊZDAR OCALAN TÊK ÇÛYE’
Girse heta ber Navenda Kar a Ahmet Bahçivan meşiya û li wir daxuyaniyek hate dayîn. Hevseroka DEM Partiyê ya Rihayê Ayşe Surucu di daxuyaniyê de wiha got: “15’ê Sibata 1999’an ku ji aliyê gelê Kurd ve wekî ‘Roja Reş’ tê binavkirin, salvegera komploya navneteweyî ya li dijî Rêberê Gelan rêzdar Abdullah Ocalan e. Ev dîrok îro jî di navenda nîqaşên çareseriya demokratîk de ye û bandora wê li ser siyaseta Tirkiye û cîhanê berdewam dike.”
Ayşe Surucuyê destnîşan kir ku komploya navneteweyî li hemberî biryardariya çareseriyê ya Abdullah Ocalan a li Îmraliyê bi awayekî dîrokî têk çûye û wiha axaftina berdewam kir: “Di vê pêvajoya krîtîk de, fikir û hêza çareseriyê ya rêzdar Ocalan fersenda herî mezin e ku pêşkêşî gelên me hatiye kirin.”
‘BILA MAFÊ HÊVIYÊ BÊ SEPANDIN’
Piştre Parlamenterê DEM Partiyê yê Rihayê Ferît Şenyaşar axivî û diyar kir ku kesên komplo organîze kirin negihîştin armancên xwe û wiha got: “Xwestin têkoşîna azadî û rûmetê ya gelê Kurd tune bikin, lê ev têkoşîn li hemû cîhanê mezin dibe. Komployekî nû li Rojava hat ceribandin, lê ev komplo jî bi destê Rêberê Gelê Kurd Abdullah Ocalan hat têkbirin. Gelê Kurd êdî dixwaze gavên şênber bên avêtin. Divê ‘Mafê Hêviyê’ tavilê bê sepandin û mercên xebatê yên rêzdar Ocalan bên verastkirin.”
DÊRSIM
Platforma Saziyên Demokratîk a Dêrsimê li Kolana Hunerê daxuyanî da. Di çalakiyê de pankarta “Êve roşta raştîye verva ozadîye” (Bi ronahiya heqîqetê ber bi azadiyê ve) hate hilgirtin. Hevserokê DEM Partiyê yê Dêrsimê Ozcan Ateş komplo şermezar kir.
Piştre parlamentera Dêrsimê Ayten Kordu axivî û diyar kir ku bi vê komployê tunekirina hebûna gelê Kurd hatiye armanc kirin û ev tişt got: “Ev komplo di şexsê rêzdar Ocalan de ne tenê li dijî Kurdan bû. Îro êrişên li ser Rojava jî encama vê komployê ne. Êrişên li ser Rojava, êrişên li dijî paradîgmaya azadîxwaziya jinê, demokratîk û ekolojîk in ku rêzdar Ocalan ava kiriye. Ev êriş îro bi polîtîkaya tecrîdê berdewam dikin.”
Ayten Korduyê ji bo sepandina “Mafê Hêviyê” bang kir û got: “Em vê hişmendiya komployê ya berî 27 salan şermezar dikin. Divê azadiya fîzîkî ya Birêz Ocalan teqez bê mîsogerkirin.”
XARPÊT
Platforma Saziyên Demokratîk a Xarpêtê li Garaja Xozatê daxuyanî da. Pankarta “Bi ronahiya heqîqetê ber bi azadiyê ve, em komploya 15’ê Sibatê şermezar dikin” hat hilgirtin. Hevseroka DEM Partiyê ya Xozatê Saadet Yavuz metna hevpar xwend û komplo şermezar kir.
ÇEWLÎG
Platforma Saziyên Demokratîk a Çewlîgê li Qada Bajêr daxuyanî da. Hevserokê DBP’ê yê Çewlîgê Şevket Kalindamar ji bo têkoşîna li dijî komployê bê xurtkirin bang kir. Hevserokê DEM Partiyê yê Çewlîgê Sedat Ormangoren jî got: “15’ê Sibatê ne tenê dîrokek e, roja fêmkirina vê destwerdana tarî, teşhîrkirina wê û têgihîştina heqîqetê ye. Di heman demê de banga xurtkirina têkoşîna aştî û demokrasiyê ya gelan e.”
ESKÎŞEHÎR
Rêxistina DEM Partiyê ya Eskîşehîrê li avahiya partiyê daxuyanî da. Hevserokê Eskîşehîrê Bektaş Turkmen diyar kir ku pergala tecrîdê ya Îmraliyê perçeyekî komployê ye û ev tişt got: “Divê pergala tecrîdê bi dawî bibe û mercên xebat û ragihandinê yên azad ji bo rêzdar Abdullah Ocalan bên amadekirin. Naskirina Mafê Hêviyê ne tenê daxwazek e, ji bo têkbirina komployê pêwîstiyek e. Em ê wekî DEM Partiyê ji bo jiyanekê demokratîk, adil û wekhev têbikoşin.”
CIZÎR
Li navçeya Cizîr a Şirnexê bi pêşengiya Platforma Ked û Demokrasiyê ya Şirnexê, komploya navneteweyî ya li dijî Rêber Apo hat protestokirin. Nûnerên partiyên siyasî, saziyên sivîl û gelek welatî li ber avahiya DEM Partiyê ya navçeyê kom bûn. Girseya ku bi dirûşmên “Bijî Serok Apo” û “Bê Serok jiyan nabe” bi pankarta “Bi ronahiya heqîqetê ber bi azadiyê ve” ber bi Çerxereya Dortyolê ve meşiyan.
Di meşê de bi domdarî dirûşmên “Bê Serok jiyan nabe” û “Silav silav ji Îmraliyê re hezar silav” hatin berzkirin û dowîzên bi nivîsa “Hûn nikarin bi milyonan kesan bixin odeyeke teng” hatin hilgirtin. Welatiyan ronahiyên telefonên xwe pêxistin û tarîtiya şevê ronî kirin.
Piştî meşê daxuyaniyek hate dayîn. Daxuyanî bi merasîma rêzgirtinê dest pê kir. Hevserokê DBP’ê yê Cizîrê Bager Aşkin di axaftina xwe de diyar kir ku heta Rêber Apo azad nebe, kes azad nabe. Piştî wî, Hevserokê DEM Partiyê yê Cizîrê Yilmaz Sanri metna hevpar xwend û destnîşan kir ku komplo têk çûye û Rêber Apo bi ser ketiye.
‘HETA ABDULLAH OCALAN AZAD BE EM Ê TÊBIKOŞIN’
Parlamentera Şirnexê ya DEM Partiyê Newroz Uysal Aslan jî komploya navneteweyî şermezar kir û ev tişt got: “Gelê Kurd her sal li dijî komployê li qadan e. Yahya Menekşe berî 15 salan dema komplo şermezar dikir hat qetilkirin. Em wî bi rêzdarî bi bîr tînin. Me ev komplo nas nekiriye û em ê nas nekin. Ne komploya 15’ê Sibatê û ne jî komployên li ser Rojava, em tu carî qebûl nakin. Gelê Cizîrê dê her tim xwedî li îradeya xwe derkeve. Heta ev roja reş bibe ronahî, em ê têkoşînê berdewam bikin. Kurdan li Rojava bersiva komployê da. Îro dixwazin komployê nû bikin, lê gelê Kurd dê li dijî vê heta dawiyê li ber xwe bide.”
Daxuyanî bi dirûşmên “Bijî Serok Apo” bi dawî bû. Piştî daxuyaniyê girse bi dirûşmên “Bijî berxwedana Rojava” û “Bi can bi xwîn em bi te re ne ey Serok” heta ber avahiya partiyê meşiya.
DENÎZLÎ
Rêxistina DEM Partî ya Manîsa li Pîra Taş a Horozkoyê daxuyaniya çapemeniyê da. Di daxuyaniyê de pankarta, “Bi ronahiya heqîqetê ve ber bi azadiyê” hate vekirin û dirûşmeyên, “Azad bike Rêberti”, “Hezar silav ji Îmraliyê re” û “Bê Serok jiyan nabe” hatin berzkirin. Hevseroka DEM Partî ya Manîsayê Evîn Gunsel jî îşaret bi paradîgaya demokratîk, ekolojîk û azadîxwaziya jinê kir û wiha got, “Em ê rê nedin komploya ku dixwazin di serî de li erdnîgariya Kurdsitanê û Rojhilata Navîn bixin dewrê.”
