Li Wargeha Penaberan a Şehîd Rûstem Cûdî (Mexmûr) 18’emîn Mîhrîcana Çand û Werzîşê ya 4’ê Nîsanê ku her sal bi boneya rojbûna Rêber Apo ji aliyê Komîteya Perwerdeyê ya Wargeha Mexmûrê ve tê lidarxistin, îro di roja sêyemîn de bi pîrozbahiya girseyî, bi govenda li ber stranên hunermendan bi coş bidawî bû.
Şahiya ku îro piştî nîvro bi hatina xwendevanên dibistanên seretayî, navîn, amadeyî û peymangehê, her wiha xelkê wargehê li qada pîrozbahiyê ya Navenda Çand û Hunerê ya Mexmûr (NÇHM), destpê kir, heta direngiya şevê dewam kir.
Di bernameya mîhrîcanê ya îro de, di saetên piştî nîvro de pêşbirka zanistî, koma mûzîkê ya dibistana amadeyî, koma govendê ya dibistana amadeyî, pêşbirka dengbêjiyê, pêşbirka govend hebû.
Di saetên şevê de jî bi gerandina govendê ya li ber stranên hunermendan, 18’emîn Mîhrîcana Çand û Werzîşê ya 4’ê Nîsanê ya Wargeha Mexmûrê bi coşeke mezin bidawî bû.
Hêjayî bibîr xistinê ye ku weke kevneşopiyek ya Mîhrîcana Çand û Werzişê ya 4’ê Nîsanê ya li Wargeha Mexmûrê tê lidarxistin, beriya her sê rojên mîhrîcanê, pêşbaziyên werzişê di navbera dibistanan de tên lidarxistin.
Her wiha di roja yekemîn ya mîhrîcanê de ango 2’yê Nîsanê mîhrîcan bi vekirina pêşengeha hunerî ku piranî ji wêne û tabloyên Rêber Apo yên ji aliyê xwendevanên wênesaz ve tên xêzkirin, destpê dike. Di 3’yê Nîsanê de ango di roja duyemîn ya mîhrîcanê de jî ji aliyê gel, sazî û kesayetan ve serdana pêşangehê tê kirin.
Roja sêyemîn ya mîhrîcanê, ango 4’ê Nîsanê pîrozbahiya girseyî li qada NÇHM’ê tê lidarxistin. Di roja sêyemîn ya mîhrîcanê de pêşbirkên zanistî, mûzîkê, dengbêjî, govend û gelek pêşbaziyên din di navbera dibistanan de tên lidarxistin.
Mîhrîcan di saetên direngiya şevê de bi gerandina govenda azadiyê ya li ber stranên li ser Rêber Apo û şoreşê bidawî dibe.
