Parêzerên ji Navenda Mafên Jinan a Baroya Amedê beriya bi demeke nêz serdana Girtîgeha Girtî ya Jinan a Amedê kirin. Parêzeran di serdanê de hevdîtin bi girtiyên siyasî û edlî re kirin, çavdêrî li pirsgirêkên li girtîgehê û binpêkirina mafên mirovan kirin. Ji heyetê endama desteya rêveberiya navendî parêzer Fîlîz Yilmaz li ser çavdêriyên xwe axivî.
Fîlîz Yilmaz bi ragihandina binpêkirinên mafên mirovan dest bi axaftina xwe kir û anî ziman ku girtiyan destpêkê giliyê xwarin û xwedîkirinê kir. Fîlîz Yilmaz got, “Gelek gilî û gazin ji heyeta me re hate ragihandin ku xwarin bi pirsgirêk têne amadekirin. Xwarina diyetê bi têrkerî ji nexweşên şekir re nayê dayin. Ji bo nexweşên tansiyonê xwarin nayê amadekirin.”
Fîlîz Yilmaz anî ziman ku peydakirina malzemeyên paqijiyê pirsgirêkeke cidî ye, malzemeyên hîjyenê ji girtiyan re nayê dayin, girtî neçar dimînin ku ji kantînê bi xwe bikirin, lê buhayê li kantînê jî gelekî zêde ye. Her wiha diyar kir ku piştî protestoyan beriya 3-4 salan kamera li koxûşan hatiye bicihkirin û ev yek binpêkirina mafê mahremiyetê ye.
Parêzer Fîlîz Yilmaz anî ziman ku kesên serdana girtiyên siyasî dikin li kiryarên cihêkar rast tên û got, “Heta bi lêgerîna tazîkirî li xizmên girtiyan tê ferzkirin. Girtiyên jin her wiha anîn ziman ku di asta destdirêjiyê de lêgerîn li wan tê kirin, sîng û cihê vajînayê bi dest lê lêgerîn.
Fîlîz Yilmaz ragihand ku di wergirtina xizmetên tenduristiyê de prisgirêkên cidî hene û got, “Di mûayeneyên doktor ên li derveyî girtîgehê de bi gotina ‘psîkolojîk’ e li pirsgirêkên tenduristiyê yên girtiyan nayê guhdarîkirin. Ji ber vê jî nayên dermankirin. Her wiha anîn ziman ku dermanên SGK nade, nikarin peyda bikin.”
Fîlîz Yilmaz bal kişand ser biryarên Desteyên Çavdêrî û Şopandinê û anî ziman ku bi hincetên nehiqûqî yên vê desteyê girtiyên ku cezayê wan temam bûne bi kêfî nayên berdan.
Parêzer Fîlîz Yilmaz anî ziman ku herî zêde ji aliyê binpêkirina mafê tenduristiyê, mahremiyetê, xwarinê, hîjyen, weşanê û kiryarên cihêkar ve girtiyan gilî û gazin kirine û got, wê mijarê bi cihên pêwendîdar re binirxînin.
