Li navçeya Nisêbîn a Mêrdînê, li Goristana Hecacilerê êirşî gorên kesên ku di demên cuda de di têkoşîna azadiya Kurd de jiyana xwe ji dest dane hat kirin. Gelek kevirên goran û mermerên li dora wan hatin şikandin û darên ku li kêleka goran hatibûn çandin hatin rakirin. Ji meha Çileyê ve, dema ku xwepêşandanên li dijî êrişên li ser Bakur û Rojhilatê Sûriyeyê hatin lidarxistin, leşker li ber goristanê nobedê digirin. Tê îdiakirin ku êriş ji hêla van leşkeran ve hatiye kirin. Her wiha hat hînbûn ku du hefte berê li heman goristanê êrişek bi heman rengî çêbûye.
Êriş bi daxuyaniyek çapemeniyê ya bi pêşengiya MEBYA-DER’ê hat şermezarkirin. Daxuyaniya ku li cihê êrişê hat dayîn, nûnerên partiyên siyasî, rêxistinên girseyî yên demokratîk û gelek kes beşdar bûn. Hevserokê MEBYA-DER’ê yê Mêrdînê Salih Kuday got: “Ew bi van êrişan nikarin Kurdan ji holê rakin. Ev êrişa bêrûmet ne tenê li dijî Kurdan e, li dijî hemû mirovahiyê ye. Bêyî ku şert û merc çi bin, tu bawerî û îdeolojî destûrê nade êrişên li ser goristanan. Kes vê yekê qebûl nake. Em van êrişan şermezar dikin. Li her quncikeke navçeyê kamerayên ewlehiyê hene. Ger hêzên ewlehiyê bixwazin, dikarin tavilê van provokatoran tespit bikin. Divê ev dijminên mirovahiyê demildest bên eşkerekirin. Em van hêzên tarî yên ku dixwazin şer berdewam bike, şermezar dikin.”
Parlamentera DEM Partiyê ya Mêrdînê Berîtan Guneş Altin jî destnîşan kir ku tişta hatiye kirin li dijî mirovahiyê ye û got ku ew vê hovîtiyê qebûl nakin.
Piştî daxuyaniyê li şûna darên li ber goran ên hatin şikandin, darên din hatin danîn.
