Berdevka Têkiliyên Derve ya KNK’ê Nîlufer Koç anî ziman ku di ser banga Rêber Apo re 2 meh derbas bûne, lê belê dewletê gaveke ber bi çav û şênber neavêtiye.
Nîlufer Koç ji ANF’ê re axivî û got, “Banga Rêber Apo di nava du mehên derbasbûyî de gelek pêşketinên girîng bi xwe re afirand. Hem li qada civakî nîqaşeke cidî bi xwe re anî hem jî di nava hemû derdoran de hêviyek afirand. Rêber Apo stratejiyeke welê danî holê ku her kesî tevlî vî karî dike. Pêvajoyeke welê ye ku hem bi aliyê Kurdistanî hem jî bi aliyê muxalefeta Tirkiyeyê her kesî tevlî dike. Lewma ma pêvajoyeke gelekî xurt û berfireh a du mehan li pey xwe hişt.”
Koç anî ziman ku banga ‘Aştî û Civaka Demokratîk’ di heman demê de projeyek e û bi dewamî got, “Ji bo guherîna polîtîkaya dewletê ya sed salan a înkar û qirkirinê, projeyk pêşkêş kir. Ji bo karibe pêvajoya aştiyê bi rê ve bibe divê bi rola xwe rabe û ji bo vê jî divê şert û merc bêne afirandin.
Dewlet di vê mijarê de bi demê re mijûl dike. Pêvajoyek ji du mehan di ser re derbas bû, lê belê hîn gaveke şênber nehatiye avêtin. Ya rast banga 27’ê Sibatê karê dewletê hêsan kir. Li gorî tecrûbeyên danûstandinê yên din, nêzîkatiyeke gelekî cuda hate nîşandan. Nêzîkatiyeke ku karê dewletê hêsan kir, ji ber ku aliyê Kurd li pişt gorina Rêber Apo sekinî. Gel ev yek di Newrozê de nîşan da. PKK’ê bi ragihandina agirbestê bersiv da vê yekê. Aliyê Kurd di vê mijarê de zelal e. Bi qasî zelaliya Rêber Apo aliyê Kurd jî zelal e. Pirsgirêk ew e ku dewletê di nava du mehan de gavek neavêtiye. Her wiha di nava dewletê de hin alî hene ku naxwazin şer bi dawî bibe. Şer nesekinî. Çekên kîmyewî têne bikaranîn. Her wiha aktorên ku wê tevlî avakirina civaka demokratîk bibin têne girtin. Êrîş û zext li ser muxalefeta li Tirkiyeyê û hêzên şoreşger heye. Li aliyekî bersiveke bi vî rengî tê dayin. Ev yek aliyê bi rîsk ê vî karî ye.”
Nîlufer Koç anî ziman ku dewlet bi dilxwazî tevlî vê karî nebû û got, “Welê tê fêhmkirin. Berxwedana mezin a Tevgera Azadiyê ya Kurd xwe weke faktora navxweyî nîşan da. 10 sal in berxwedaneke mezin hate nîşandan. Hem li eniya gerîla hem jî li elilya gel û siyasetê berxwedaneke mezin hebû. Vê yekê zor da dewletê. Ya duyemîn jî li parçeyên din ên Kurdistanê vaye li Rojava, li Iraqê Kurd gihîştineke asteke xurt. Vê yekê pozîsyona Kurdan a li herêmê bi temamî guhert. Ya rast ji Şoreşa Rojava û vir ve di dîplomasiya navneteweyî de Kurd êdî veguherîn muxatabekî hevgirtî, cihê baweriyê. Vê yekê kir ku Kurd bi rengekî mezin qezenç bikin Kurd li Rojhilata Navîn veguherand aktorekî Ev yek di polîtîkaya derve de ji bo dewleta Tirk bû zextek.”
Berdevka Têkiliyên Derve ya KNK’ê bal kişand ser dijberiya li Kurdan a di polîtîkaya derve ya Tirkiyeyê de û got, “Ya ku Wezareta Karên Derve ya Tirk dike, berevajî polîtîkaya navxweyî ye. Divê bê zanîn hem zimanê Devlet Bahçelî hem yê Tayyîp Erdogan û polîtîkaya derve ji hev cuda ne. Bi dîtina min ev polîtîkaya derve wê bi ser nekeve. Kurd li ku derê sîstemekê ava bikin zerarê nadin berjewendiyên kesî. Xwedî helwesteke gelekî demokratîk û lihevkirinê ne. Bi dîtina min ev yek baş tê pêkanîn û dîtin.”
Nîlufer Koç destnîşan kir ku ji bo pêvajo veguhere demokrasiyê divê Rêber Apo ji Îmraliyê derkeve û got, “Heta ku li Îmraliyê be çûn û hatina Îmraliyê wê di bin kontrola dewletê de be. Ev jî tê wê wateyê ku dewlet kengî bixwaze wê destûra hevdîtinê bide. Weke ku 26 sal in dike, dema dixwazin têkiliyên qut dikin. Eger Rêber Apo ji wir derkeve û bibe xwedî derfet ku karibe bi rengekî çalak tevlî pêvajoyê bibe, ev yek wê guhertineke bingehîn bi xwe re bîne. Naxwe em ê li rewşa berê vegerin. Qonaxa derbasbûnê krîtîk e. Kilîda wê Rêber Apo ye lê belê divê her kes tevlî vê pêvajoyê bibe, xwe aktor bibîne.”
