Ev 3 roj e li taxa Xerbî ya Qamişloyê konê sersaxiyê ji fermandar û pêşengê şoreşa Bakur û Rojhilatê Sûriyeyê Nûreddîn Sofî re hatiye danîn. Piştî ku duh bi pêşwaziya bi deh hezaran kesan fermandar Nûreddîn Sofî hat oxirkirin, îro di bin kon de merasîmek pêk hat. Kon bi wêneyên şehîd Nûreddîn Sofî, Koçero Urfa, Bextiyar Gabar û Rêber Apo hatin xemilandin.
Pêkhateyên kantona Cizîrê bi dirûşmên “Şehîd namirin” berê xwe dan kon. Saziya Malbatê Şehîdan, sazî û rêxistinên girêdayî Kongreya Star, sazî û dezgehên Rêveberiya Xweser a Bakur û Rojhilatê Sûriyeyê, TEV-DEM, şêxên eşîrên pêkhateya Ereb, Partiya Yekitiya Suryan, partî û saziyên pêkhateyên Siryan, Ermen, fermandar û şervanên QSD’ê, Kongreya Îslama Demokratîk, MSD, mamosteyên Zanîngeha Rojava, saziyên tenduristiyê, hevseroka Rêveberiya Xweser Evîn Siwêd, cîgirê hevserokên Meclîsa Cîbicîkar a Rêveberiya Xweser Hesen Koçer, fermandarê QSD’ê Lokman Xelîl, Şêx Mirşîd El Xeznewî, hevseroka PYD’ê Perwîn Yûsiv, hevseroka TEV-DEM’ê Remziye Mihemed, hevserokê Saziya Malbatên Şehîdan Rêzan Gulo beşdarî merasîmê bûn.
Di bin kon de dayikan bi kefiyên kesk, sor, zer ku li serê xwe pêçabûn, di destê wan de wêneyên şehîd, bi lorînên xwe lehengî û têkoşîna şehîd Nûreddîn Sofî vegot.
Merasîm ji aliyê Saziya Malbatên Şehîdan ve hat rêvebirin. Di merasîmê de endamê Saziya Malbatên Şehîdan Mihemed Cemîl di kesayeta şehîd Nûreddîn Sofî de tevahî şehîd bi bîr anîn û got: “Me bi şehîdan dest pê kir, me bi şehîdan israr kir û em bi şehîdan ber bi azadiyê ve dimeşin. Me planên sedsalî yên dagirkeran têk birin. Em ê ji bo domandina rêya şehîdan her tiştî bikin.”
Li ser navê QSD’ê Kawa Gulo wiha axivî: “Heval Nûreddîn fikrên Rêber Apo ji xwe re kirin esas. Piştî derbasî şoreşa Rojava bû, di bin siya wî de pêşketinên dîrokî çêbûn. Di yekitiya pêkhateyên herêmê de kedeke mezin da. Mînaka wê jî YPG, YPJ, QSD ne. Îro çavê hemû pêkhateyan li QSD’ê ye ji bo azadiyê. Ev keda şoreşgerên wekî heval Nûreddîn Sofî, Xebat, Elî ye.”
Hevseroka TEV-DEM’ê Remziye Mihemed jî diyar kir ku şehîd Nûreddîn Sofî bi felsefeyeke rast hevaltiya jinan kir û wiha domand: “Heval Nûreddîn kedeke mezin di avakirina TEV-DEM’ê de da. Heval Nûreddîn şagirtekî Rêber Apo ye, gotinên Rêber Apo bi lêv dikirin û pêk dianî, me ev di xebatên wî de dît. Ji bo ku em xwedî li şehîdên xwe derkevin, divê em minetdarê wan bin û bi xebatê û têkoşînê bikarin vê minetdariyê nîşan bidin.”
Piştî wê hevserokê Meclisa Rêveber a Kantona Cizîrê Hesen Şero bi navê Rêveberiya Xweser sersaxî ji malbatê re xwest û got: “Bedewbûna Kurdistanê bû armanca dewletên dagirker, lê li beranberî wê berxwedan û têkoşîneke mezin hat meşandin. Ji bo wê keç û xortên Kurdan canê xwe feda kir. Îro di merasîma şehîd Nûreddîn de girêdana gel bi şehîd û doza xwe re diyar bû. Israra berxwedanê diyar bû. Em li pêşiya vî gelî soz didin şehîdan ku em ê li ser şopa şehîd Nûreddîn Sofî û hemû şehîdan tê bikoşin.”
Hevseroka PYD’ê Perwîn Yûsif jî diyar kir ku şehîd Nûreddîn bi baweriyeke mezin, bi keda bi salan a li çiyayê Kurdistanê daye, bi perwerdeya ji Rêber Abdullah Ocalan girtî berê xwe da Rojavayê Kurdistanê û wiha domand: “Kevirê bingehîn ê Rêveberiya Xweser ku niha ji tevahî Sûriyeyê re bûye mînak, danî. Em bi şans in ku bi perwerdeya heval Nûreddîn tê koşiyan. Heval Adil, heval Nûreddîn Sofî, ew soza me daye we, em ê pêk bînin.”
Şêx Murşîd El Xeznewî ku beşdarî merasîmê bû axivî. El Xeznewî şehîd Nûreddîn bîr anî û wiha got: “Em îro di hizûra şehîd Nûreddîn Sofî de ne, lê ne ji bo şînê, ji bo şahiya jiyana wî. Ji ber ku şehîd dibe ramanek, dibe alek li ser rêya heq û azadiyê. Cudahiyeke mezin di navbera mirin û şehadetê de heye, mirin rewşeke giştî ye, her ruh dê bimire. Welatparêz jî dimirin, çete û xayîn jî dimirin, pêxember dimirin û kesên normal jî dimirin. Lê şehadet mertebeyeke mezin e û bi destê her kesî nakeve. Şehîd Nûreddîn jî yek ji van e ku Xwedê şehadet kiriye qismeta wî. Cudahiya duyemîn jî ew e ku mirin dawiya jiyanekê ye lê şehadet destpêka jiyanekê ye. Cudahiya sêyemîn; ê ku dimire em jê re dua dikin, lê yê ku şehîd dibe em ji ruh, xwîn, ked û berxwedana wî agirekî hildidin û dikin dilê xwe, ji bo ku li ser rêya azadiyê bimeşin. Şehîd Nûreddîn ronahiyek bû di rûyê tariyê de, li ser rêya azadiyê. Bila malbatên şehîdan nebêjin xwîna zarokên me vala çû. Ji bo wê em soz didin rêya wan bimeşînin. Va ye em welatekî azad ava dikin.”
Piştre mamosteyê Zanîngeha Rojava Beşîr Mela Newaf got ew dixwaze “bi zimanê şîrîn şehîd vebêje, ew jî zimanê helbestê ye” û helbesta bi navê “Giyanê We li Asoya Welat” xwend.
Hevserokê Kongreya Îslama Demokratîk Mele Xerzanî jî şehîd bîr anî, qala têkoşîna şehîd kir û wiha got: “Dê şopa lingê te li ser çiyayên bilind ên Kurdistanê bimîne.”
Ji Partiya Yekitiya Suryan Semherîb Bersûm jî li ser navê gelê Suryan, partî û rêxistinên Suryan sersaxî ji gelê herêmê re xwest û wiha got: “Şehîd jiyana azad pêşkêşî gel dikin.”
Li ser navê MSD’ê Hisên Ezam jî sersaxî ji malbatê û gel re xwest.
Li ser navê malbata şehîd Nûreddîn Sofî jî kurê birayê şehîd Ehmed Ebdullah axivî. Ebdullah got: “Nûreddîn Sofî ne tenê kurê vê malbatê bû, kurê tevayî malbatên Kurd, Ereb, Suryan û pêkhateyan bû. Em sersaxiyê ji tevahî gelan re dixwazin. Em sersaxiyê ji malbatên şehîd Koçero Urfa û Bextiyar Gabar re jî dixwazin. Heval Nûreddîn ji bo dozekê, li dijî zilmê kete nava têkoşînê. Di her alî de ew gihaşte asteke bilind. Îro Rojava di tevahî Sûriyeyê de mînakeke herî mezin e, em pê serbilind in.”
Malbata şehîd Xebat Dêrik jî ku beşdarî merasîmê bûbû, sersaxî ji malbatê re xwest.
Hejaro ku astengdar e û beşdarî gelek çalakiyên li Bakur û Rojhilatê Sûriyeyê dibe jî spasiya hêzên leşkerî kir, sersaxî ji malbatê re xwest.
Tê payîn ku 2 rojên din jî kon vekirî bimîne û gelên herêmê serdanê bikin.
