Konfederansa Jinên Kurd a Yekemîn a Rojava di 23’ê Adarê de li Parka Azadî ya Qamişloyê bi dirûşma ‘Yekîtiya Neteweyî ya Kurd bi pêşengiya jinên Kurd pêk tê’ hate lidarxistin. 300 delege beşdarî konferansê bûn. Dîwan ji Bedevka Kongra Star Rîhan Loqo, Hevseroka Partiya Yekîtiya Demokratîk Perwîn Yûsif, Endama Meclîsa Jinê ya Bakur û Rojhilatê Sûriyeyê Stêra Qasim, aktîvîst Sîham Emoka û Seroka Tevgera Paşerojê ya Kurdistanê Narîn Metîni pêk hat.
Di rûniştina destpêkê ya konferansê de li ser bûyerên siyasî rapor hate xwendin û bi nîqaşên beşdaran rûniştina destpêkê bi dawî bû. Rûniştina duyemîn jî bi sernavê ‘Li Rojavayê Kurdistanê Konferansa Yekîtiya Jinê ya Neteweyî ya Kurd’ destpê kir û rapora ji 11 xalan a ji mijarên yekîtiya jinên Kurd, çand û nasnameya jinên Kurd, neteweya demokratîk, Jineolojî, hevjiyana azad, têkoşîna ji bo mafên jinan, parastina destketiyên şoreşê, xweparastina jinê û aboriya jinê hate xwendin û nîqaşkirin. Konfeans bi encamnameya ji 12 xalan bi dawî bû.
Ji beşdarên konferansê Hevseroka Desteya Têkiliyên Derve ya Bakur û Rojhilatê Sûriyeyê Îlham Ehmed û Endama Koordînasyona Helebê ya Kongra Star Nêrgiz Bekir li ser girîngiya konferansê ji ANF’ê re axivîn.
ATMOSFEREKE GIRÎNG JI BO GAVÊN RAST
Îlham Ehmed bi bîr xist ku di demekê de ku polîtîkayên qirkirinê yên li ser gelê Kurd dewam dikin, rêxistinbûn, peydakirina nêrîneke hevpar û yekbûna li ser helwestekê gelekî girîng e û got, “Di konferansê de her kesî bi rengekî azad nêrîna xwe anî ziman. Di demeke bi vî rengî de weke gelê Kurd ji bo avêtina gavên rast, atmosfereke girîng hate afirandin. Jinê Kurd pêşengiyê ji vê re dikin. Gava li Rojavayê Kurdistanê hate avêtin wê ji bo hemû parçeyên din ên Kurdistanê bibe gaveke dîrokî.”
DI DÎROKA JINÊN KURD DE RÛPELEKÎ NÛ
Îlham Ehmed ragihand ku jinên Kurd bi salan e di nava têkoşîneke bêeman de ne û bi dewamî got, “Jinên Kurd li çeperên şer fedakariyên mezin kir. Hinek jê şehîd bûn, hinek jî gazî bûn. Di heman demê de li eniya siyasetê jî bi roleke çalak rabûn. Ji bo doza Kurd, polîtîkaya qirkirinê ya li hemberî gelê Kurd li cîhanê bê bihîstin bi roleke mezin rabûn. Di encama têkoşîna piralî de ev konferans îro pêk hat. Di dîroka jinê Kurd de wê bibe rûpelekî nû. Bi wesîleya vê konfearnsê wê rêxistiniya xwe xurt bike, paşeroja xwe di vê çarçoveyê de ava bike û pêşengiya xwe mezin bike. Civakeke azad bi jineke azad dikare ava bibe. Eger em doza welatekî azad dimeşînin divê beriya her tiştî civak azad bibe, ji bo azadiya civakê jî divê jin azad bibe. Lewma ji bo pêkhatina nêrîna hevpar û helwesteke hevpar ev konferans wê bibe wesîleya gavên girîng.”
PÊŞÎGIRTINA LI ŞERÊ NAVXWEYÎ
Îlham Ehmed destnîşan kir ku Konferansa Jinê ya Neteweyî ya Kurd a Rojava ji bo pêkhatina Konferansa Neteweyî ya Kurd a Rojava bûye zemînek û got, “Ji bo Kurd nebin yek û parçe bibin, gelekî hewl hate dayin. Îro jin bi lihevkombûnê re eger nêrîneke hevpar diafirînin, ev yek wê bandoreke mezin li gelê Kurd jî bike. Ji ber vê yekê gavên destpêkê ye. Di demeke kurt de wê bigihêje encamê. Di navbera partiyên siyasî yên Kurd ên li Rojava de wê tifaqek bê ragihandin. Ji bo pêşî li şerekî navxweyî yê nû yê li Sûriyeyê bê girtin û mafên gelê Kurd bêne garantîkirin ev tifaq girîng e.”
GERDÛNÎBÛNA TÊKOŞÎNA JINÊ
Nêrgiz Bekir bi bîr xist ku di konferansê de nîqaş li ser wê yekê hatiye kirin, bê jin wê bi çi rengî tevlî paşeroja nû ya Sûriyeyê bibin û got, “Her nêrîn nîşaneya hêza jinê ye. Bi van nêrînan re wê rêxistinî, têkoşîn û îradeya jinê derkeve holê. Jinên Kurd zêdeyî 13 sal in ji bo guhertina çarenûsa Sûriyeyê têkoşîneke mezin meşandin. Bi têkoşîna jinê Kurd re divê jin dest bidin hev. Gerdûnîbûna têkoşîna jinê wê mejiyê serwer ê mêr ê li nava civakê biguherîne. Bi taybetî bi têkoşîna li Sûriyeyê re divê pêşengî ji çar parçeyên Kurdistanê re bê kirin. Êşa herî giran, zilm, tundî û komkujî bi serê jinê de hatin. Lewma divê têkoşîn jî ewqasî xurt be.”
PÊŞKETINÊN NÛ WÊ PÊK WERIN
Nêrgiz Bekir diyar kir ku bi têkoşîna jinên Kurd re ya ku li Şoreşa Rojava gihîşt asta herî bilind, bi pêkhatina yekîtiya jinên Kurd re wê pêşketinên nû rû bidin û got, “Nêrîna hevpar a jinên Kurd ji bo jinûve nivîsandina destûra bingehîn a Sûriyeyê gelekî girîng e. Her wiha jin wê bibe wesîleya belavbûna neteweya demokratîk û azadîparêziyê, yekîtiya Kurd û paradîgmaya neteweya demokratîk.”
