Rêxistina Mafê Mirovan a Rojhilatê Kurdistanê ragihand ku di nava çend rojên borî de li bajarên cuda yên Rojhilatê Kurdistanê çalakvanek Kurd û welatiyek din bi cezayê girtîgehê hatine mehkumkirin. Her wiha çarenûsa girtiyek Kurd nediyare û du welatiyên din jî hatine binçavkirin.
Li gorî daxuyaniya rêxistinê, 6’ê Cotmehê çalakvanê sivîl ê Kurd Agare Sadiqî yê ji bajarê Bokan a Rojhilatê Kurdistanê, piştî ji bo şaxa pêkanîna cezayê dadgeha Îranê ya li Bokanê hate vexwendin, ji bo derbazkirina cezayê xwe şandin girtîgehê.
Agare Sadiqî di Gulana 2024’an de ji aliyê hêzên ewlekariyê ya Îranê ve hatibû binçavkirin û piştre ji aliyê Şaxa Yekemîn Dadgeha Şoreşê ya Mahabadê ve bi tometa ‘propagandaya li dijî dewletê’ bi salek cezayê girtîgehê hatibû mehkumkirin.
Heman demê welatiyê Kurd Yunis Tenhayî yê ji gundê Hemzawa yê ser bi bajarê Mihabad a Rojhilatê Kurdistanê ji aliyê Şaxa Yekemîn a Dadgeha Şoreşê ya Mahabadê ve bi serokatiya dadwer Yasir Guzelî, 20 meh û rojekê cezayê girtîgehê bi ser de hate sepandin. Yunis Tenhayî ku bavê du zarokan bû, bi tometa ‘hevkariya komên dijî Îranê’ hatiye cezakirin.
Yunis Tenhayî di dema girtinê de ji hemû mafên xwe yên bingehîn ên wekî gihîştina parêzer û hevdîtina bi malbatê re bêpar hatiye hiştin. Yunis Tenhayî di Hezîrana 2025’an de ji aliyê hêzên îdareya Îtlaatê ya Mahabadê ve bêyî fermana dadwer li mala xwe hatibû binçavkirin.
48 ROJ IN AGAHÎ JI HOŞYAR ŞEBANÎ NAYÊ GIRTIN
Rêxistinê destnîşan kir ku îro 48 rojin çalakvanê civaka sivîl û girtiyê siyasî yê berê yê Kurd Hoşyar Şebanî (31) binçavkiriye. Hoşyar Şebanî yê ji bajarê Bane ya Rojhilatê Kurdistanê ji roja hatî binçavkirin ve agahî jê nehatiye girtin û nayê zanîn li kuderê tê ragirtin.
Hoşyar Şebanî di 20’ê Tebaxa îsal de li navçeya Kanî Sûr ya Bane di wesayîta xwe rastî gulebarana hêzên Wezareta Îtlaatê ya Îranê hat û bi sê guleyan birîndar bû. Hoşyar bi birîndarî hate binçavkirin.
Her wiha çalakvanê civaka sivîl Hoşyar Şebanî di salên 2017-2018-2019-2022’yan de ji ber çalakiyên civaka sivîl ku ji beşdarbûna pêngavên piştevaniya ji bo kolber û grevan pêk dihat, gelek caran hatiye binçavkirin û ji ber du sucan bi cezayê girtîgehê hatiye mehkumkirin.
Di nava çend rojên borî de welatiyê Kurd ê bi navê Hesen Mêhrabî (42) yê xelkê gundê Nê ya ser bi bajarê Merîwan a Rojhilatê Kurdistanê, ji aliyê hêzên ewlekariyê yên Îranê ve hate binçavkirin û ber bi cihek nediyar ve hate birin. Hesen Mêhrabî ji bo navenda hêzên ewlekariyê ya parêzgeha Merîwanê hatibû vexwendin, piştî gihiştina bajar ji aliyê hêzên Îranê ve hate binçavkirin ku cilûbergên sivîl li berbûn.
PÊLA ZEXT Û BINÇAVKIRINÊ ZÊDE DIBE
Di heman demê de, pêla girtin, cezakirin û vexwendina welatiyên Kurd li Rojhilatê Kurdistanê berdewam dike, rewşa girtiyên di girtîgehên rejîma Îranê de di xetereyê de ye. Her wiha mamoste û rexnegirên olî tên cezakirin.
Rêxistina Mafê Mirovan ya Kurdistanê derbarê darvekirinan de raporek belav kir. Li gorî raporê di meha Îlona îsal de li Rojhilatê Kurdistanê 47 kes hatine darvekirin.
