Li bajarê Sao Paulo yê Brezilya gelek rêxistinên navneteweyî û şoreşger li ber Ofîsa Bazirganiyê ya Tirkiyeyê civiyan û di salvegera duyemîn a kampanyaya navneteweyî ya ji bo azadiya Rêber Apo de tê meşandin de çalakî lidar xistin. Di çalakiyê de banga azadiya Rêber Apo û girtiyên siyasî hate kirin.
Di çalakiyê de komploya navneteweyî ya 9’ê Cotmehê hate şermezarkirin û piştgirî ji kampanyaya navneteweyî ya ji bo Rêber Apo hate nîşandan. Rêxistinên civakî yên beşdarî çalakiyê bûn bal kişandin ser polîtîkayên qirkirinê yên li ser gelê Kurd û peyamên piştgiriya navneteweyî dan.
Rêxistinên sereke yên beşdarî çalakîyê bûn ev in: Luta Popular, MES-PSOL (Partiya Sosyalîzm û Azadiyê – Tevgera Sosyalîst), Colectivo Latinoamericano Berta, Movimiento de Juventud Ya Basta, Colectivo de Juventud Juntos, OSL (Rêxistina Sosyalîst a Azadîxwaz), PSTU (Partiya Karkerên Sosyalîst a Yekbûyî), Editorial Contrabando, SINTUSP (Sendîkaya Karkeran), SOB (Sosyalîzm an Barbarî) û rêxistina Treta no Trampo.
Hemû rêxistinên civakî bi hev re peyama “Azadiya Abdullah Ocalan azadiya gelan e” dan û piştgirî dan pêvajoya aşitiyê û civaka demokratîk ku Rêber Apo di 27’ê Sibata 2025’an de dabû destpê kirin. Di çalakiyê de gelek belavokên ku têkoşîna gelê Kurd û Rêber Apo vedibêjin hatin belavkirin.
Aktîvîsta femînîst Tamara Suri, di çalakiyê de bal kişand ser girîngiya derketina kolanan di salvegera duyemîn a kampanyayê de. Tamara Suri behsa dîroka gelê Kurd û dagirkirina axa Kurdistanê û di têkoşîna jinan de rola Rêber Apo kir. Piştre, daxuyaniya hevpar a ku ji aliyê gelek rêxistinên Brezîlyayê ve hatibû îmzekirin hate xwendin û axaftin hatin kirin.
Nûnerê MES-PSOL’ê Bruno Magalhães, diyar kir ku piştgirî bi xwe nîşana tevlîbûna têkoşîna gelan e. Bruno Magalhães got: “Dema ku cîhan nizanibû çawa li dijî DAÎŞ’ê têbikoşe, gelê Kurd û bi taybetî jinên li Rojava ji hemû cîhanê re nîşan dan ku berxwedan çi ye. Dewleta Tirk dixwaze têkoşîna hevalên me yên li Kurdistanê bifetisîne; lê em ji girtiyan û şervanan, ji gelê herî mezin ê bêdewlet, biryardariyê fêr bûn. Em berxwedana Abdullah Ocalan silav dikin.”
Nûnerê PSTU û Sendîkaya Karkeran Fabio, jî di axaftina xwe de got ku biryardariya têkoşîna navneteweyî piştgirî ji têkoşîna hemû gelên cîhanê re ye û wiha dewam kir: “Em li gel têkoşîna gelê Kurd in, em piştgirî didin gavên ku PKK’ê avêtin. Tevî êrîşên ku ew rastî tên jî, ew ji bo gelê xwe pergaleke jiyanê ya konfederal ava kirin. Ev ji bo me hemûyan dibe hêviya modelek nû. Em hemû rêxistinên siyasî ji bo azadiya axa Kurdistanê û azadiya Abdullah Ocalan têdikoşin û piştgirî didin.”
Nûnerê OSL’ê Kauan William, jî diyar kir ku mafê hemû gelan ê ku çarenûsa xwe diyar bikin û got ku mafê xweseriyê rêgeza têkoşîna enternasyonalîst e. Kauan William got: “Em têkoşîna hemû hêzên demokratîk ên femînîst, antîfaşîst û sosyalîst bi rêzdarî silav dikin. Tevgera Azadiya Kurdistanê ji bo cîhanê mînakek e. Azadî ji Ocalan re, aştî ji hemû gelan re!”
Nûnerê Editorial Contrabando Aldo Cordeiro got: “Tiştê ku îro me dike yek hestê xwişk û biratiyê ya bi gelê Kurd û gelê Filistînê re ye. Gelê Kurd û PKK’ê li hemberî gefên qirkirinê yên dewleta Tirk berxwedan. Têkoşîna wan beşek ji têkoşîna ji bo azadî û xweseriyê ya li Rojhilata Navîn e. PKK’ê mînakek şoreşger a serdema me ye. Em hûrmeta xwe ya kûr ji Abdullah Ocalan re dişînin; azadiya wî ji bo azadiya hemû girtiyên Kurd û pêşveçûna pêvajoya aştiyê li Rojhilata Navîn gavek girîng e. Têkoşîna jinên Kurd hêviya têkoşîna li dijî desthilatdariyê ye.”
