Serokkomarê AKP’î Receb Tayyîp Erdogan di 12’ê Tîrmehê de li Kizilcahamamê axivî û bal kişandibû li ser “Torosên Spî”. Erdogan di axaftina xwe de gotibû, “Torosên Spî bi dawî bûn.” Li ser van gotinan tenê çend roj derbas bûn, lê li ser maseya dozgerê lêpirsîna Şaredariya Bajarê Mezin a Stenbolê dimeşîne de makêta “Torosên Spî” derket holê.
Wêneyê dozgerê lêpîrsîna ÎBB’ê û şaredar Ekrem Îmamoglû yê di meqamê wî de hatiye kişandin û li ser maseya wî makêta “Torosa Spî” heye ji aliyê Parlamenterê CHP’ê Sezgîn Tanrikulu ve hat weşandin. Wêne rastî bertekan hat.
Tanrikulu wiha got:
“Di 12’ê Tîrmehê roja Şemiyê hûn li Kizilcahamamê axivîn û we ‘Torosên Spî’ wekî kiryarên xirab ên serdemê bi nav kir û mahkûm kir. Dozgerê ku makêta Torosên Spî bi kar tîne ji lêpirsîna Şaredarê Bajarê Mezin a Stenbolê Ekrem Îmamoglû, şaredaran û siyasetmedaran berpirs e!
Li ser vê mijarê wê gotin û pêkanînek we hebe? “Beyaz Toros” di dîroka me de travmayeke girîng e. Bi van wesayîtan bi sedan welatî û xizmên me hatin revandin û windakirin. Hîna jî aqûbeta wan nayê zanîn. Ji ber vê yekê Torosên Spî bûne sembolek û barekî bîrê.
Li stadyûm û trîbûnan pankartên ‘Torosên Spî’ hatin vekirin. Hinekan ew ji bo mahkûm bikin bi kar anî û hinekan jî wekî gefa serdemê bi kar anî. Li ber mala min jî Torosa Spî rawestiya. Serdozgerê demê yê komarê li min geriya û got: ‘Bi ti awayî derî veneke û dernkeve ji derve re’. Ez wê şevê qet ji bîr nakim. Ev travma ne kesî ye û civakî ye.
Îro jî dozgerê lêpirsînan dimeşîne, makêtek Torosa Spî li ser maseya wî heye.
Niha bê van lêpirsînan çawa dimeşînin baştir tê famkirin. Dozgerên ku makêta Torosên Spî yên ku di cînayetên kiryarên nediyar de hatine bikaranîn, bi kar tînin li ser kar in û lêpirsînên ku hiqûqa dijminane li dijî şaredar, burokrat û karsazan bi kar tînin. Gotinên min ji bo Serokkomar Erdogan, Wezîrê Edaletê û Lijneya Bilind a Dadger û Dozgeran e;
Ma hesabpirsîna we ev e? Me daxuyaniya xwe da, serokê me yê giştî îro tiştê ku pêwîst bû got. Ger bersiveke we hebe, hûn ê bibêjin.”
