Dema ku tarîtiya DAÎŞ’ê weke ewrekî reş bi ser axa pîroz a Şengalê de girt, ji her çar parçeyên Kurdistanê û ji derveyî welat, keç û xortên Kurd bi dilekî tije tolhildan û bi ruhê azadiyê berê xwe dan çiyayê Şengalê. Ev qîrîna hewara fermanê, di nav refên gerîla û şervanan de bû meşeke ber bi nemiriyê ve. Ji HPG û YJA-Starê heta YPG û YPJ’ê, ji YBŞ’ê heta YJŞ’ê, bi sedan leheng mîna deryayê herikîn da ku rûmeta mirovahiyê û pîroziya vê axê ji qirêjiya tarîtiyê paqij bikin. Di vê oxirê de, bêtirî 500 şervan û gerîlayên ku xwe kirin mertal, bi xwîna xwe her bihostek ji vê axê av dan û heta serkeftinê destê xwe ji çeka azadiyê bernedan.
Îro li ser lûtkeyên herî bilind ên Çiyayê Şengalê, ew lehengî di bin sîbera Goristana Şehîd Dilgeş û Şehîd Berxwedan de dilteniyekê dide hemû gelê Şengalê. Ev goristan ku navê xwe ji fermandarê HPG’ê Şehîd Dilgeş û fermandarê YBŞ’ê Şehîd Berxwedan digire, ne tenê cihê vehesîna şehîdan e, lê di heman demê de bîra zindî ya dîrokê û keleha vîna gel e. Dema mirov berê xwe dide vî cihî, bêhna berxwedanê ji her kevirî û her kulîlkê tê. Nexasim di demên baranê de, dema ku dilopên asîmanî li ser gorên şehîdan dibarin, xweşikiya vê goristanê dibe dîmenekî bêhempa ku mîna ku xweza bi xwe jî ji vê fedakariya mezin re rêzê digire. Ji bo gelê Şengalê, serdana van şehîdan ne tenê wefayek e, lê di heman demê de girtina hêzê ye ji bo siberojeke azad ku li ser milên van nemiran hatiye avakirin.
