Pîrozbahiya Newrozê ya “Newroza Azadî û Yekîtiya Demokratîk” a li Parka Newrozê ya li navçeya Rezan a Amedê bi beşdariya bi sed hezaran kesî pêk hat. Girseya gel serê sibehê qad dagirt û bi dirûşm û posterên xwe coşa Newrozê nîşan da. Bi taybetî jî daxwaza azadiya Rêber Apo hate kirin.
Ji bajarên cuda yên Tirkiyeyê jî tevlîbûn li pîrozbahiyê bû. Îrem Naz Çelîk a ji Enqereyê tevlî bû, diyar kir ku Newroz ji bo wê tê wateya aştî, azadî û demokrasiyê û got, “Em jin bi wê bawer in ku bi dirûşma ‘Jin, Jiyan, Azadî’ di nava paşerojeke aştî û azadiyê de bijîn.”
Hatîce Guneş jî işaret bi wateya dîrokî ya Newrozê kir û got, “Newroz ji bo me berxwedan e. Serhildana Kawayê Hesinkar a li hemberî zilmê ye, nîşaneya agirê berxwedanê ye ku Mazlûm Dogan li zindana AMedê bi sê derbikên niftikê pê xist. Ji ber vê yekê jî Newroz roja azadî û berxwedanê ye.”
Hanîfe Kaya jî daxwaza aştî û azadiyê anî ziman û xwest, girtî bêne berdan, zindan bêne valakirin. Hanîfe Kaya daxwaza nasname û azadiyê destnîşan kir û got, “Em bi Rêberê xwe re ne, aştî û azadiyê dixwazin. Em azadiya Rêberê xwe û hemû girtiyan dixwazin.”
‘JI BO GELÊ KURD WÊ ROJEK HILÊ’
Mecît Ûrgay jî got, “Newroz ji bo me destpêka azadiyê ye û azadiya Birêz Ocalan e. Weke ku Yilmaz Guney got, ‘Rojekê wê roj ji bo me jî hilê’. Ew roj dema ku Birêz Ocalan azad bû wê ji bo gelê Kurd hilê.”
Hakki Aslan ragihand ku wan li qada Newrozê daxwaza aştî û wekheviyê anîn ziman û got, “Em dixwazin di navbera Kurd û Tirkan de aştî pêk were. Em alîgirê aştiyê ne, ne alîgirê şer in. Em wekheviyê dixwazin.”
Salîh Kalir jî destnîşan kir ku Newroz ji bo gelên bindest hemûyan cejna azadiyê ye. Îsmaîl Akbaba jî ragihand ku divê Newroz ji bo gelan hemûyan nîşaneya jiyaneke aştiyê û bi hev re be.
