Bi boneya 8’ê Adarê Roja Jinên Kedkar ên Cîhanê, jinan li Sêrt û Êlihê meş û mîtîng lidar xistin.
Li Sêrtê, bi pêşengiya Meclîsa Jinan a DEM Partiyê, jin li Kolana Guresê meşiyan û dirûşmeyên “Jin, jiyan, azadî” berzkirin û daxwazên xwe yên ji bo wekhevî, azadî û aştiyê anîn ziman.
Di daxuyaniyan de, bal kişandin ser zêdebûna şîdeta li dijî jinan û banga xurtkirina têkoşîna li dijî pergala serdest a mêran hate kirin. Hat diyar kirin ku Şoreşa Jinan a Rojava ji bo tevahiya jinan wekî çavkaniya îlhamê ye û hate gotin ku jin di têkoşîna aştî û civakek demokratîk de rolek pêşeng dilîzin.
Li Êlihê jî bi heman armancê tevî barana zêde, gelek jin beşdarî mîtînga 8’ê Adarê bûn ku ji hêla Tevgera Jinên Azad (TJA) ve hate organîzekirin.
Di axaftinan de, behsa yekîtî û têkoşîna azadiya jinên Kurd hat kirin û hat gotin ku divê jin hem di pêvajoya aştiyê de û hem jî di têkoşîna civakî de roleke pêşeng bilîzin.
Çalakî û mîtîng bi berzkirina dirûşme û gerandina govendê bidawî bûn.
