Rêxistinên çapemeniyê, rojnamevan, rêxistinên civaka sivîl û nûnerên partiyên siyasî ji bo rojnamevanên girtî li Qada Tunela Taksîmê ya Beyoglu ya Stenbolê kom bûn û daxuynaî dan. Di daxuyaniya ku ji hêla MKG, DFG, DÎSK Basin-Îş û TGS’ê ve hatî dayîn de daxwaza berdana xebatkarên ETHA’yê Pinar Gayip, Elîf Bayburt, Nadiye Gurbuz û Muslum Koyûn hat kirin.
Rojnamevan û nûnerên partiyên siyasî yên di daxuyaniyê de axivîn, polîtîkayên binçavkirin, girtin û zextê yên li ser rojnamevanan rexne kirin û daxwaza parastina azadiya çapemeniyê kirin.
Rojnamevan Eylem Nazlier daxuyaniya hevbeş xwend. Eylem Nazlier diyar kir ku xebatkarên ETHA’yê ji ber xebatên xwe yên rojnamevaniyê hatine girtin û bi bîr xist ku nêzîkî pênc meh in hîn îdianame nehatiye amadekirin. Eylem Nazlier hedefgirtina nûçegihana Ajansa Mezopotamyayê Sema Bîngol û gefên li dijî Nûjinhayê şermezar kir û diyar kir ku nabe ku rojnamevanî wekî sûc were dîtin.
Di daxuyaniyê de hat destnîşankirin ku lêpirsîn, binçavkirin û girtina rojnamevanan li Tirkiyeyê sîstematîk bûye û hat xwestin ku rojnamevanên girtî tavilê werin berdan.
Di çalakiyê de nameya xebatkara ETHA’yê Pinar Gayip ya ku li Girtîgeha Jinan a Bakırkoyê girtî ye hat xwendin. Pinar Gayip diyar kir ku tevî zextên li ser rojnamevanan jî, ew ê rastiyê ragihînin û peyama “Çapemeniya azad nayê bêdengkirin” parve kir.
