Bi ser berxwedana Tişrînê de salek derbas bû. Di 27’ê Mijdara 2024’an de piştî êrîşên çeteyên HTŞ û SMO’yên yên li ser Helebê dane destpêkirin roja 8’ê Kanûnê piştî hilweşîna Şamê li ser bendavê êrîş dane destpêkirin. Di 8’ê Çileya 2025’an de jî gelên Bakur û Rojhilatê Sûriyeyê berê xwe dan Bendava Tişrînê û li servê yekê ‘’Berxwedana Tişrînê veguherî Şerê Gel ê Şoreşgerî.’’ Di 5’ê Gulana 2025’an de jî li gel daxuyaniyên ji aliyê fermandariyên QSD û YPJ’ê ve hatin dayîn, Berxwedana Tişrînê li hemberî êrîşên çeteyên HTŞ û SMO’yê bi ser ket. Şervanên QSD’êji ANF’ê re axivîn û anîn ziman ku Berxweda Tişrînê ya ku nêzîkî 5 mehan berdewam kir, Stalîngrad û berxwedana Keleha Dimdimê’’ ya gelên Bakur û Rojhilatê Sûriyeyê ye.
‘GELÊN BÊYÎ XWEPARASTIN TIM BI KOMKUJIYAN RE RÛ BI RÛ NE’
Mazlûm Zexirî yê ku di eniyên pêş ên Berxwedana Tişrînê de cihê xwe girtibû, anî ziman ku gelê Bakur û Rojhilatê Sûriyeyê li gel berxwedana Tişrînê îspat kir ku bi Şerê Gel ê Şoreşgerî wê serkeftin were bidestxistin û got: ‘’Di dema berxwedana Tişrînê de weke pêngava yekem ez li girê Tel ê Sûriyeyê tevlî berxwedanê bûm. Piştre min li gundê Qelqelê di nava berxwedanê de cihê xwe girt. Li hemberî hemû êrîşên hewayî û teknîkî me li gel gelê xwe di nava berxwedanê de cihê xwe girt. Berxwedana Tişrînê, berxwedana hevpar a şervanên QSD’ê û gelên Bakur û Rojhilatê Sûriyeyê ye. Berxwedana Tişrînê, îspata wê yekê ye ku wê li gel Şerê Gel ê Şoreşgerî serkeftin were bidestxistin. Hatina gelê me ya li ser bendavê, berxwedan û fedekariya wan hêz dida me. Me bi saya hêz û morala ku gelê me dida me, ev berxwedan mezin dikir. Berxwedana Tişrînê nîşan da ku berxweda gel û şervanan tu caran têk naçe. Û hemû caran bi xwe re serkeftinê tîne. Ji bo vê yekê jî divê gelê me hemû caran li dora hêzên parastinê QSD, YPJ, YPG û Hêzên Asayîşê kom bibin û bi hêzên parastina xwe bawer bikin.’’
Şervanê QSD’ê Mazlûm Zexirî di dawiya axaftina xwe de diyar kir ku gelên ku xweparastina xwe ava nekin wê tim û tim bi komkujiyan re rû bi rû bimînin û ev yek anîn ziman: ‘’Bila gelê me vê yekê baş bizanibe ku gelên ku hêza xwe ya xweparastinê ava kirine wê tim û tim êrîşên komkujiyê re rû bi rû bimînin. Dîroka nêz şahidê vê yekê ye. Di sala 2014’an de li Şengalê komkujiya çeteyên DAÎŞ’ê yên ku a niha di nava hêzên SMO û HTŞ’ê de cih digirin, êrîşên komkujiyê yên çeteyên SMO-HTŞ ên li ser gelê Elewî yên di destpêka meha Adarê de careke din nîşanî me dan ku gelên bêyî xweparastin, wê tim û tim bi êrîşên komkujî û qirqirinê re rû bi rû bimînin. Ji bo vê yekê di serî de gelê me divê piştgiriyê bidin hêzên xweparastinê û wan mezin bikin. Gelên li Sûriyeyê dijîn divê girêdayî xweparastinê xwe birêxistin bikin û xwe biparêzin.
‘LI GEL BERXWEDANA TIŞRÎNÊ ÎRADEYA ÇETEYÊN HTŞ-SMO’YÊ HATE ŞIKANDIN’
Şervanê QSD’ê Demhat Rojava yê di nava berxwedana Tişrînê de cih girtiye, ev yek anîn ziman: ‘’Berxwedana me ya li gel berxwedana mezin a li bendava şehîdan, li gel serkeftina gelan bi encam bû. Li Bendava Tişrînê berxwedaneke mezin pêk hat û ruhekî mezin derket holê. Tevî ÎHA, SÎHA, balafirên şer, tank û topên dewleta Tirk jî çeteyên HTŞ-SMO’yê li Bendava Tişrînê li hemberî gelan têk çûn. Li Tişrînê li gel gelê me berxwedaneke mezin a weke berxwedanên Stalîngrad, Keleha Dimdimê ku di dîrokê de mînakên wê kêm in, pêk hat. Û li hemberî vî ruhê berxwedanê tevî ku dijminî serî li hemû teknîkan dida jî di hemû êrîşên xwe de bi paşde gav diavêt û direviya. Tişrînê, îradeya çeteyên HTŞ û SMO’yê şikand û moraleke mezin dida gelên Bakur û Rojhilatê Sûriyeyê. Û li gel Berxwedana Tişrînê dubare hate îspatkirin ku stratejiya Şerê Gel ê Şoreşgerî tu caran têk naçe.’’
‘HEMÛ HEVALÊN ME BI FEDAIYANE BI SER DIJMIN DE ÇÛN’
Şervanê Ereb Dilşêr Tirbespî ê di nava hêzên QSD’ê de cih digire,diyar kir ku hemû şervanên ku di nava berxwedana Tişrînê de cih girtine ji bo parastina gel û welatê xwe bi terzeke fedaî li ber xwe dane û ev yek anîn ziman: ‘’Min di nava koma ku cara ewil derbasî Bendava Tişrînê de cihê xwe girt. Dema ku em çûn di serî de komên çeteyên El Emşat ên girêdayî dewleta Tirk çeteyên HTŞ û SMO’yê gihîştibûn bendavê. Me jî demildest hêzên xwe kom kirin, planên xwe kir û em weke tîman belav bûne enî û mewziyan. Ji ber ku em hêza şerî bûn û me xwe li gorî şerî perwerde û amade kiribû. Li bendavê tevî teknîka dewleta Tirk û hewayî û bejahî jî me li hemberî çeteyên HTŞ û SMO’yê berxwedaneke baş pêş xist. Hemû hevalên me bi fedaiyane bi ser çeteyan de diçûn û ew têk dibirin. Her çend çete xwediyê teknîkan bûn jî ji ber ku bê pergal û dîsîplîn bûn li hemberî hevalên me derbeyên mezin dixwarin. Ji ber vê yekê pergalû dîsîplîna me hêz û moral dida me. Em ne evîndarên şerî ne. Lê belê em amade ne ku ji bo gel û xaka xwe heya dilopa xwîna xwe ya dawîn şer bikin û li ber xwe bidin.’’
‘EM HEMÛ YEK DIL Û YEK RUH BÛN’
Şervanê QSD’ê Dilşêr Tirbespî di dewama axaftina xwe de anî ziman ku di Berxwedana Tişrînê de şervanên Kurd, Ereb, Suryanî, Ermenî, Êzidî û Elewî li heman eniyan şer kirine û axaftina xwe bi van gotinan bi dawî kir: ‘’Weke şervanên Kurd, Ereb, Suryanî, Ermenî, Êzidî û Elewî me li heman eniyan li dijî çeteyan şer dikir. Ji ber ku em hemû bi ruh û dilekî li dora armancekê kom bûbûn. Armanca me, azadî û parastina gelê me û xakên me bû. Ji ber wê yekê ez weke şervanekî Ereb ê ku xakên Bakur û Rojhilatê Sûriyeyê ku bihara gelan e, diparêze bi dewlemendiya şervanên QSD’ê şad û serbilind im. Her wiha tu hêz nikarin êrîşî nirxên li Bakûr û Rojhilatê Sûriyeyê bikin. Ez dubare diyar dikim ku ji bo vê yekê em amade ne heya dilopa xwîna xwe ya dawîn şer bikin û li ber xwe bidin.’’
