Êrîşên komên girêdayî Hikumeta Demkî ya Sûriyeyê ku ev çend roj in li ser taxên Şêxmeqsûd, Eşrefiyê û Benî Zêdê didomin, li gelek bajaran hatin protestokirin. Di daxuyaniyên hatin dayîn de êrîş hatin şermezarkirin û banga bêdengnemayîna li hemberî komkujiyê hate kirin.
WAN
Platforma Ked û Demokraiyê, xwest têkildarî êrişên li ser taxên Kurdan Şêxmeqsûd û Eşrefiyê yên Helebê, li ber Şekerbankê ya li navçeya Rêya Armûşê ya Wanê heta Kolana Hunerê meşekê li dar bixe. Lê polîsan bi hinceta “li nava bajêr meş qedexeye” nehişt girse bimeşe. Girseyê bi dirûşmên “Bijî berxwedana Rojava”, “Bijî Serok Apo” û “Wê Kurdistan ji DAÎŞ’ê re bibe goristan” bertek nîşanî biryarê dan û li wir daxuyanî da. Di daxuyaniyê de pankarta “Xwedîderketina Rojava, xwedîderketina mirovahiyê ye” hat vekirin. Endam û rêveberên partiyên siyasî, nûnerên saziyên sivîl û bi sedan welatî tevlî çalakiyê bûn.
Li ser navê platformê Sevda Akin Akar metna daxuyaniyê xwend û bal kişand ser mafên Kurdan ên bingehîn. Sevda Akin Akar destnîşan kir ku divê rêz li mafê Kurdan ê xwe bi rê ve birinê bê girtin û banga deng derxistinê li dostên Kurdan û raya giştî ya cîhanê kir. Sevda Akin Akar di dawiya daxuyaniyê de banga tevlibûna meşa ku dê di 15ê Çileyê roja pênçşemê de li Parka Kûrtûlûşê li dar bixin, kir.
Piştî daxuyaniyê ciwan, di nava kolanan de bi dirûşmeyan meşiyan û fîşekên hewayî teqandin. Car car di navbera ciwanan û polîsan de pêvçûn derketin û bi dirûşmeyan çalakî bi dawî bû.
ÎZMÎR
Platforma Demokrasiyê ya Narlidereyê, êrîşên Hikumeta Demkî ya Sûriyeyê yên li ser Helebê, li pêşiya Polîklînîka Taxê ya Narlidereyê bi daxuyaniyekê protesto kir. Di daxuyaniyê de pankarta “Ji komkujiyên li Sûriyeyê re bibêje raweste” hat hilgirtin û gelek welatî beşdar bûn. Di daxuyaniyê de bi domdarî dirûşmên “Jin, jiyan, azadî” û “Bijî aştî” hatin berzkirin û li ser navê Platforma Demokrasiyê ya Narlidereyê, Bulent Karakaş metna daxuyaniyê xwend.
Karakaş, bertek nîşanî gotinên Serokwekîla Koma AKP’ê Leyla Şahîn Usta yên li ser komkujiyên Elewiyan da û destnîşan kir ku Elewî ji bo jiyana wekhev a gelan têdikoşin. Karakaş bal kişand ser êrîşên li dijî taxên Şêxmeqsûd û Eşrefiyê û ev tişt got: “Yên ku berê komên cîhadîst û nîjadperest dane ser gelan, divê Berxwedana Kobanê ji bîr nekin. Dema gelên bindest hatin cem hev, çawa ku DAÎŞ hat şikandin di bîra her kesî de ye. Bi heman awayî, baweriya me tam e ku dê HTŞ jî li hemberî berxwedana hevpar a gelan têk biçe. Wekî pêkhateyên Platformê; em bang li saziyên mafên mirovan ên navneteweyî dikin ku ji bo rawestandina hewildanên komkujiyê yên HTŞ’ê tavilê gavên şênber biavêjin û ji bo vegera ewle û birûmet a mirovên ji cih û warên xwe bûne, berpirsiyariyê li xwe bigirin.”
Daxuyanî bi dirûşman bi dawî bû.
