Rêxistinên DEM Partiyê, Partiya Herêmên Demokratîk (DBP) û Tevgera Jinên Azad (TJA) bi armaca bangawaziya mitînga ku 28’ê Hezîrana 2026’an bi dirûşma “Bi Rêbertiya Azad ber bi Civaka Demokratîk” li Qada Stasyonê ya Amedê were lidarxistin li Navçeya Xelfetiyê ya Rihayê daxuyanî dan. Parlamenterê DEM Partiyê yê Rihayê Omer Ocalan, Endam û rêveberên partiyên siyasî û nûnerên saziyên sivîl ên demokratîk û gelek kes tevlî daxuyaniyê bûn. Di daxuyaniyê de pankarta “Bi Rêbertiya Azad ber bi civaka demokratîk ve” hat vekirin û diruşma “Bijî Serok Apo” hat berzkirin.
Kurmanciya daxuyaniyê ji ailyê Hevseroka DEM Partiya ya Rihayê Ayşe Surucu, Tirkiya wê jî rêveberê DBPê ya Rihayê Omer Kistak ve hate xwend.
Ayşe Surucu diyar kir ku li Rojhilata Navîn a di pêvajoya şer de derbas dibe, aştî ji bo hemû gelan pêdiviyeke herî bingehîn e û wiha got: “Bangawaziya birêz Abdullah Ocalan di 27’ê Sibatê de kiribû hem di asta herêmî de û hem jî di asta gerdûnî de dengekî mezin veda. Ev bang ji bo çareseriya demokratîk, jiyana hevpar û demokratîbûyîna Tirkiyeyê hêviyeke mezin afirand. Piştî vê bangawaziyê şer sekinî û em ji her demê zêdetir nêzî aştî û çareseriyê bûn.”
Ayşe Surucu destnîşan kir ku divê ji bo aştiyeke bi rûmet dewlet gavên pêwîst bi lezgînî bavêje û ev tişt anî ziman: “Divê qanûnên derveyî demokrasiyê bên guhertin, dawî li polîtîkayên qeyûman ên li ser vîna gel bê anîn. Hemû qedexeyên li ser ziman û çanda Kurdî divê bên rakirin û statuya Kurdî bê naskirin û girtiyên siyasî werin berdan.”
Di dewama axaftina xwe de Ayşe Surucu bal kişandin ser tecrîd, şert û mercên Rêber Apo lê têne ragirtin û got, ji bo aştî û çareseriya demokratîk bi pêş bikeve, divê rêya azadiya fîzîkî ya Rêber Apo bê vekirin, şert û mercên wî bên sererastkirin.
Ayşe Surucu ji bo ‘Mîtînga Azadiyê’ banga tevlîbûnê kir û wiha dawî li axaftina xwe anî: “Di vê serdema girîng de, em ji navçeya Xelfetiyê ku Rêber Abdullah Ocalan lê ji dayik bûye bang li gelê xwe dikin. Werin em di 28’ê Hezîranê de, saet di 17:00 de li Qada Stasyonê ya Amedê bi dirûşmeya ‘Bi Rêbertiya azad ber bi civaka demokratîk ve’ daxwazên xwe biqîrin û azadiya fîzîkî ya Birêz Ocalan pêk bînin.”
Daxuyanî berzkirina dirûşmeya “Bijî Serok Apo” bi dawî bû.
