Di 6’ ê Çileyê 2026’an komên girêdayî Hikûmeta Şamê ya Demkî li ser taxên Şêx Meqsûd û Eşrefiyê êrîş dan destpêkirin. Êrîş di wir de nesekinîn û heta bi tevahiya herêmên Bakûr û Rojhilatê Sûriyeyê ketin nava wan êrîşan. Di encama wan êrîşan de Rêveberiya Xweser ji bo parastina herêmê seferberî îlan kir. Di wê seferberiyê de ciwan, jin, kal û pîrên Rojavayê Kurdistanê berê xwe dan kolan û çeperên şer û li kêleka şervanên xwe cih girtin.
Hozan Ebdullah jî yek ji wan ciwanên bû ku bi banga seferberiyê re berê xwe dabû parastina axa xwe û Hozan dema ku ew li Dêr Hafirê bû li wir ji aliyê komên Hikûmeta Demkî ya Şamê ve tê dîlgirtin.
Malbata Hozan Ebdullah ji ANF’ê re axivî û daxwaza vegera Hozan û hevalên wî kir.
Di despêkê de Selîme Mihemed a dayîka Hozan Ebdullah axivî û diyar kir ku kurê wê di 17’ê Çileyê de hatiye girtin û ev yek anîn ziman: ‘’Wexta ku êrîş li ser Rojavayê Kurdistanê zêde bûn û seferberî hate îlankirin û Hozan jî hat û got ku ji min re çanteyê min amade bikin, ez ê herim tevlî seferberiyê bibim. Roja ku ji mal berê xwe da Dêr Hafirê Pêncşem bû, Înê bi me re axivî û roja Şemiyê me nema agahî jê girt. Hozan di 17’ê Çile de hate girtin.’’
Dayîka Hozan Ebdullah daxwaz kir ku Hozan û hemû hevaln xwe werin derxistin û vegerin malen xwe û got: ‘’Ez dixwazim Hozan û hemû hevalên wî vegerin mala xwe. Em di meha rojiyê de û cejn li pêşiya me ye. Daxwaza min ew e ku kurê min beriya cejnê were û bila cejna me bibe du cejn.’’
Feysel Tewfiq Ebdullah ê bavê Hozan Ebdullah jî axivî û ev yek anîn ziman: ‘’Hozan bi îlankirina seferberiyê re ji malê derket û berê xwe da Dêr Hafirê. Dema ku çû cara yekem birîndarên berxwedana Taxa Şêx Maqsûdê anîn, cara duyem jî çû, du rojan bi me re axivî û roja sêyan êdî me agahî jê nestand. Me nekarî em xwe bighînin wî. Daxwaza me tene ew e ku ew dîlgirtî vegerin cem malbatên xwe.’’
Bavê Hozan Ebdullah di dawiya axaftina xwe de got ku eger kurê wî şehîd bûbe hezar carî pîroz be û ev yek anîn ziman: ‘’Welat bêyî xortên wê çênabe û Rojava welatê me hemûyan e, divê em hemû ji bo wê her tiştî bikin. Hozan bi kêfxweşiyeke mezin ji malê derket. Ger Şehîd be sed carî pîroz be ji welatê me re, lê belê ger dîlgirtî be bila vegere cem me.’’
