Desteya Koordînasyona Sendîkayên Mamosteyên Rojhilatê Kurdistanê û Îranê kampanyayek bi navê “Ji Darvekirinê re Na; Erê ji Mafê Jiyanê re” da destpêkirin û bang li welatiyan kir ku bêyî tirs nerazîbûna xwe ya li hember cezayê darvekirinê îlan bikin.
Desteyê di daxuyaniyekê got; “Tu hikûmet, dewlet an desthilatdarî xwediyê jiyana mirovan nîne û mafê jiyanê ne girêdayî biryara serdestane. Mafê jiyanê mafê herî bingehîn û bêpar yê her mirovî ye. Ji ber vê yekê, em li dijî her şêweyê darvekirinê ne. Di bin her tometekê de, em wê wekî dijî rûmeta mirovan, mafê jiyanê û edaletê dibînin.”
Her wisa desteyê cezayê darvekirinê wekî çavkaniya tolhildana hikûmetan pênase kir û normalîzekirina cezayê darvekirinê dihêle ku desthilatdar xwe bike xwediye jiyan û çarenûsa welatiyan û biryarê li ser bide.
Di daxuyaniyê de bang li welatiyan hate kirin bêyî cudahiya bawerî, girêdanên siyasî, etnîsîte an ol ku bi îmzekirina kampanyayê piştgirîya rakirina cezayê darvekirinê û sererastkirina qanûnên dadwerî yên Îranê bikin. Her wisa daxwaza bikaranîna cezayên sererastkirinê di dozan de kirin û hate tekezkirin ku çalakiyên siyasî, derbirîna ramanê, xwepêşandanên aştiyane û daxwazên mafên sivîl divê weke sûc neyên dîtin.
Heta niha, di kampanyayê de zêdetirî 600 îmze hatine berhevkirin ku armanca destpêkê ya gihiştina 1000 îmzeyane.
Desteya Hemahengiya Sendîkayên Mamostayên Rojhilatê Kurdistanê û Îranê berê daxuyaniyek weşandibû û piştgirî dabû kampanyaya “Sêşemên ji Darvekirinê re Na” û greva birçîbûnê ya girtiyên li Yekîneya 2 ya Girtîgeha Qezil Hisar.
Li gorî rapora salane ya Rêxistina Efûyê ya Navnetewî, rejîma Îranê di sala 2025’an de herî kêm 2 hezar û 159 kes ku di nav de 61 jin, darve kiriye.
