Dema ku “Banga Aştî û Civaka Demokratîk” a Rêber Apo li cîhanê deng vedide, piştgiriya ji bo pêvajoya aştiyê di qada navneteweyî de zêde dibe. Zanyara siyasetê Jino Victoria Doabi ku herî dawî di qada polîtîkaya navneteweyî ya navend Kopenhagê de xebatê kir, ji Medya Haber TV re axivî, bal kişand ser girîngiya dîrokî ya banga Rêber Apo û bang li Yekîtiya Ewropayê kir ku piştgiriyê bide pêvajoyê.
‘BANGA OCALAN Û ÇEKDANÎNA PKK’Ê GAVEKÎ DÎROKÎ YE’
Jino Victoria Doabi wiha got: “Divê her kes piştgirî bide gavên ji bo aştî, pêşketin û demokrasiyê têne avêtin. Di vê çarçoveyê de banga Ocalan û biryara çek danînê ya PKK’ê gavekî dîrokî ye. Ev geşedan nîşan dide ku gelê Kurd ê li Tirkiyeyê, wekî gel û neteweyek xwedî îradeyeke demokratîk e, lêgerîna çareseriya siyasî dike û ev çareserî di nav têkoşîna gelê Kurd de pêkan e. Ev jî hem di asta neteweyî û hem jî asta navneteweyî de hêjayî piştgiriyekî cidî ye.
‘GAVÊN OCALAN Û PKK’Ê, TENGIYÊN DEWLETA TIRK EŞKERE KIR’
Li gorî min, Ocalan û PKK’ê bi avêtina gavên ji bo pêvajoya aştiyê, di heman demê de tengiya bingehîn a Tirkiyeyê eşkere kirine. Ev dîlema ev e; Ya yekemîm, dewleta Tirkiyeyê ji ber çi li ser Kurdan polîtîkaya paqijkirina etnîkî pêk anî? Ji ber çi Tirkiye ewqas bi dijminane çû bi ser Kurdan; wisa bû ku nikarîbû peyva ‘Kurd’ jî bike?
Pirsgirêka duyemîn jî Erdogan e. Pozîsyona wî ya siyasî, li ser dijminatiya Kurdan hatiye avakirin.
‘TIRKIYE NIHA DI NAVA BÊÇAREBÛNEKE CIDÎ DE YE’
Tu planên Tirkiyeyê ji bo başkirina rewşa xwe ya aborî, hilberandina çareseriya krîza avhewayê, nîqaşkirina pirsgirêkên civakî, pêşketina di qada perwerdehiyê de û meseleyên din ên ji bo pêşxistina gelê Tirk û xakên Tirkiyeyê, tune ye. Ev rastî êdî bi eşkerehî derketiye holê. Ji ber vê yekê, Tirkiye niha di nava bêçarebûneke cidî de ye.
Rastiya, ‘Belê, me qala pêvajoyeke aştiyê kir, lê di rastiyê de em di vê miijarê de ne cidî bûn’ îro di qada navneteweyî de bi awayekî zelal derdikeve holê. Ji ber ku ji aliyê Tirkiyeyê ve tu gavên şênber û cidî nehatine avêtin. Li hemberî vê, em dibînin ku PKK û Ocalan vê pêvajoyê cidî digrin dest. Di heman demê de bi zelalî li holê ye ku hem li Rojava hem jî li Bakur dijminatiya li dijî Kurdan dewam dike.
‘YEKÎTIYA EWROPAYÊ DIVÊ GAVEKÎ PIŞTGIRÎKIRINA PÊVAJOYÊ AŞTIYÊ BIAVÊJE’
Ji DYE’yê zêdetir, ez difikirim ku divê bi taybet Yekîtiya Ewropayê bi rêya zexta siyasî, navbeynkarî û angajmanên şert, ji bo piştgirîkirina pêvajoya aştiyê rolekî çalak li xwe bigre. Kaja Kallas qalê dikir ku Ewropa dikare bibe hêzekî ku piştgiriyê bide pêvajoyên avakirina saziyan û ez difikirim ku ev fikrek pir baş e. Ji ber ku li Ewropayê û di nav Yekîtiya Ewropayê de ezmûnek me ya cidî ya derbarê bê ka modelên wekî federalîzm û rêveberiya xweser çawa bi ser dikevin de, heye.
Ez her gavekî ji bo aştiyê, teqdîr dikim û hêvî dikim ku Yekîtiya Ewropayê gavên di vî aliyê de biavêje.”
