Nav: Jîndar Ezgî Dersim (Pinar Yildirim)
Navnîşan: Eyaleta Zagrosê, Herêma Gerdiya, Kampa Zivistanê.
Telefon û e-mail: Rêyên navbera newalên kûr û zinarên bi heybet…
Navnîşana kar: Her kevir, xak, berf, cemed a Kurdistanê; akademî, kamp… bi kurtasî her cih.
Weke ku di van hevokan de tê dîtin, ‘Welatê min ê çîrokan’ cografyayê weke navnîşanekê, têkoşînê weke şêweyekî jiyanê, azadiyê jî weke rengê hebûnê yê rojane nîşan dide.
Rojnivîsên Jîndar Ezgî (Pinar Yildirim) bi navê ‘Welatê min ê çîrokê’ hate weşandin. Pirtûka ku bi tevkariya Newaya Jin ji weşandinê re hate amadekirin, wêneyê bergê wê jî ji aliyê Sînan Hezer ve hate amadekirin. Pirtûk ji aliyê Weşanên Meymanê ve hate çapkirin.
‘Welatê min ê çîrokan’ cîhana navxweyî ya gelekî, têkoşînekê û jinekê, dilxwaziya wan a azadiyê bi şahidiya wêjeyî vedibêje. Ev rojnivîsên ku Jîndar Ezgî di navbera salên 2010 û 2014’an de nivîsî, dilê bi hesret ê jiyana gerîla ya li çiyê, hişmendiya berxwedêr a ji hezkirinê û kûrahiya lêgerîna azadiyê destnîşan dike.
‘Welatê min ê çîrokan’ ne tenê bi rûpelên salnameyê derbas dibe. Carna bi xewn û bîranînan, carna bi hesreta bi hevrêyên şehîd ketin, carna bi rengê ronahiya sibehê ya çiyayekî, carna jî bi henek û hesreta li ber qefilîna di binê berfê de derbas dibe.
Jîndar Ezgî jiyanê bi cografya Zagrosê, Reşko û Gerdiyayê difikire; çiya ne tenê warek e, dibe hevrêyek, mamosteyek û qadeke ezmûnê. Xweza li gel dijwarî, serma û xeteriyê jî d iheman demê de weke çavkaniya aîdiyet û wateyê tê dîtin.
Di pirtûkê de hişmendiyeke xurt a hevrêtiyê xwe dide pêş. Jîndar Ezgî ewladên wêrek ên welêt û dilên bedew ên ku ji dest da; Hebûn, Zîlan, Çekdar, Botan û hîng elek ji wan bi xeyal û hêviyên wan, li gel wêrekiya wan bi bîr tîne.
Pirtûk di heman demê de vegotineke kûr a azadiya jinê dike. Jîndar Ezgî jinbûyînê weke nasname û sekna têkoşînê, hesabpirsîna navxweyî û kedê dinirxîne. Têkilî, piştevanî, şer û hewldanên veguherînê yên navbera jinan beşên herî balkêş û zindî yên pirtûkê ne.
Gotina ‘welat’ a di pirtûkê de cih digire ne tenê erdnîgariyek e; dibe warekî navxweyî yê ji hesret, hevrêtî, hezkirin, berxwedan û hêviyê. Jîndar Ezgî hevok bi hevok vî welatî destnîşan dike; hem ji bo xwe, hem ji bo dîrokê hem jî ji bo siberojên azad.
‘Welatê min ê çîrokan’ ne tenê weke rojnivîseke gerîla yan jî pirtûkeke bîranînê, di heman demê de weke şahidiyeke xurt a ji têkoşîna jinê, berxwedana kolektîf û lêgerîna heqîqetê hêjayî xwendinê ye.
Pirtûk ji navnîşana meyman.org dikare bê peydakirin.
Têkildarî nivîskar:
Jîndar Ezgî (Pinar Yildirim) ku sala 1979’an li Dersimê ji dayik bû, li Enqereyê zanîngeh xwend. Di wan salan de ciwanên welatparêz nas kir û tevlî kar bû. Sala 2001’ê li gel komek ji hevalên xwe tevlî nava refên gerîla bû. Weke şervan û fermandareke YJA Starê demeke dirêj li çiyayên Zagrosê kar kir. Bi tecrûbeyên li vê derê wergirtî di sala 2012’an de ber bi Dersimê ve bi rê ket.
Jîndar Ezgî 17 salên xwe li çiyayên Kurdistanê da gelê xwe; li Qendîl, Behdînan, Zagros û piştre jî 6 salan li Dersimê bi rengê fedaî jiya. Di 15’ê Tebaxa 2018’an de li Dersimê di şer de li gel du hevalên xwe şehîd bû.
