Navenda Ragihandinê ya Hêzên Sûriya Demokratîk (QSD) der barê mijara bêbandorkirina şaneyek çeteyên DAÎŞˊê li bajarokê Zîbanê yê Dêrazorê de daxuyaniyek weşand.
Di daxuyaniyê de ev agahî hatin parvekirin:
“Hêzên Komandos ên Meclisa Leşkerî ya Dêrazorê duh êvarî li bajarokê Zîbanê yê gundewarê rojhilatê kantonê opersayonek li dar xist û şaneyeke xeternak a rêxistina DAÎŞ’ê bêbandor kir.
Operasyon piştî xebata şopandinê ku ji aliyê hêzên ewlehiyê ve hat kirin û tesbîtkirina cihên ku endamên şaneya terorî xwe lê vedişart pêk hat. Hêzên operasyonê dora veşartgehên endamên şaneyê bi xurtî girtin û ji endamên şaneyê du terorîst girtin.
Terorîstên hatin girtin beşdarî êrişên li dijî hin nuqteyên me yên leşkerî yên li herêmê bûn. Her wiha destên wan di hedefkirina nuqteyên hêzên Meclisa Leşkerî ya Dêrazorê yên li heman bajarê de hene.
Di operasyonê de hêzên me miqdareke çek û cebilxane ku li cem terorîstan dîtin desteser kirin.
Çekên hatine desteserkirin ev in: 5 tivingên kalaşînkov, 23 cercûrên tivingên kalaşînkov, 4 rextên leşkerî û 600 guleyên kalaşînkov.
Hêzên me dê operasyonên xwe yên leşkerî û ewlehî yên bi armanca qedandina şaneyên terorîst û rêgirtina li ber hewldanên têkbirina ewlehiya herêmê bidomînin.”
