Mezlûm Ebdî bi boneya 21’ê Sibatê Roja Zimanê Dayokê ya Cîhanê peyamek da û diyar kir “Pêvajoya li pêş me dê bibe pêvajoyeke serkeftî ji bo zimanê dayikê û bi taybet jî ji bo zimanê Kurdî.
Fermandarê giştî yê Hêzên Sûriyeya Demokratîk Mezlûm Ebdî bi boneya Roja Zimanê Dayikê peyamek da. Peyam Ebdî li ser hesabê Youtubeyê yê Saziya Zimanê Kurdî (SZK) hate weşandin.
Mazlûm Ebdî Roja Zimanê Dayikê li zimannas, pispor û mamosteyên zimanê kurdî pîroz kir û got: “Me li vê herêmê, bi taybetî li Sûriye û Rojavayê Kurdistanê di demên borî de gelek zehmetî dîtin. Zimanê dayikê her dem qedexe bû. Piştgiriyeke dewletê ji bo zimanê me tune bû û astengî gelek bûn.”
Mazlûm Ebdî di dewama peyama de xwe de got: “Di 14 salên dawîn de xebateke mezin hat kirin. Yek ji destkeftiyên herî mezin ên şoreşê zimanê Kurdî ye. Ne tenê ji bo zimanê Kurdî, ji bo zimanên din ên li herêmê jî rê hat vekirin.”
Ebdî îşaret bi biryarnameya 13’an a hikumeta demkî ya Sûriyeyê jî kir û got: “Wek encama şoreşa Sûriyeyê û bi taybetî ya Rojavayê Kurdistanê, me dît ku biryarnameya serokkomariyê derket. Biryarnameya 13’an wek destkeftiyeke mezin tê dîtin. Cara yekem e ku bi awayekî fermî zimanê Kurdî wek zimanekî neteweyî li Sûriyeyê tê qebûlkirin. Ev gaveke gelekî mezin e û rê li ber bikaranîna vî zimanî di hemû qadan de vedike.
“Ez ji gelê me dixwazim ku zêdetir xwedî li zimanê Kurdî derkevin. Zarokên xwe bişînin dibistanên ku bi zimanê kurdî perwerdeyê didin. Divê em zimanê xwe di jiyana rojane û di perwerdeyê de bi kar bînin.”
Mezlûm Ebdî peyama xwe bi van gotinan bi dawî kir: “Pêvajoya li pêş me dê bibe pêvajoyeke serkeftî ji bo zimanê dayikê û bi taybet jî ji bo zimanê Kurdî.”
