Mîhrîcana Fîlman a Navneteweyî ya Rojava ya 5ˊan ku ji aliyê Komîna Fîlm a Rojava û Tevgera Mezopotamya ya Çand û Hunera Demokratîk (TEV-ÇAND) ve hatiye birêxistinkirin, di roja xwe ya 8’an de li Navenda Çand û Hunerê ya Mihemed Şêxo ya bajarê Qamişloyê bi dawî bû.
Girseyeke mezin a hezkiriyên huner û sînemayê, nûnerên Rêveberiya Xweseriya Demokratîk a Herêma Bakur û Rojhilatê Sûriyeyê, kantona Cizîrê, Tevgera Civaka Demokratîk (TEV-DEM), nûnerên rêxistinên jinan, saziyên çandî, partiyên siyasî, hejmarek derhêner û sînemagerên ji Spanya, Brîtanya, Bakurê Kurdistanê û Şamê amade bûn.
Bernameya roja dawîn bi deqeyek rêzgirtin dest pê kir. Piştre koma Yekbar stran pêşkêş kirin.
Endama Desteya Serokatiya PYD’ê Aldar Xelîl di mîhrîcanê de axivî. Aldar Xelîl diyar kir ku mîhrîcana Rojava bûye dika berxwedana çandî ya ku rastiya gelên di nava şeran de nîşan dide û got, sînema bûye zimanê parastina hebûnê.
Xelîl di dewama axaftina xwe de anî ziman ku mîhrîcan gaveke girîng ji bo teşwîqkirina senarîstan û destnîşan kir ku mîhrîcanê çanda gelên resen vejand û bi çîrokan karibîn rihê şoreşgerî û dengê jinan zindî bike.
Aldar Xelîl îşaret pê kir ku domandina mîna van çalakiyan nîşaneya çalakbûna civakê û girêdana wê ya bi nasnama û çanda wê ve ye.
Endamê komîteya amadekar a mîhrîcanê Derhêner Numan Yigit axivî û got, girîngiya vê mîhrîcanê ew e ku di rewşeke welê de tê lidarxistin ku modernîteya kapîtalîst hewl dide rewşeke nû bide ferzkirin. Her wiha got: “Sînema li Rojava ji bo parastina adet, kevneşopî û nirxên resen dixebite û çîrokên gelên ku bi hewldanên çewisandinê re rû bi rû mane zindî dike.”
Numan Yigit diyar kir ku ji nêzî 200 fîlman û 22 senaryoyan, 86 fîlm hatin pêşandan û wiha domand, ji wan 8 fîlm navneteweyî ne, 21 belgefîlm in, 8 kurdî ne, 37 kurte fîlm in, 7 sûriyeyî ne, 5 vê dawiyê hatin hilbijartin û 22 ên derhênerên jin in.
Di dawiyê de encamên mîhrîcanê hatin ragihandin û 8 fîlm hatin xelatkirin. Her wiha 2 senaroyaya kurt ’’Dre Asikri’’ ya senarîst Nasreen Farqeen û senaryoya dirêj ’’Binxet” ya Gulê Welat jî hêjayê xelatê hatin dîtin.
