Şerê li Rojavayê Kurdistanê hate kirin ne tenê têkoşîna ewladên herêmê bû; ev şer weke jinûve vejîna dîrokî ya neteweya Kurdan hate nirxandin. Hêzên barbar ên mîna DAÎŞ’ê ne tenê êrişî cografyayekê kirin, van hêzan êriş birin ser nasname, çand û paşeroja gelekî û komkujiyên mezin kirin. Ev rewş bû sedem ku hişmendiya neteweyî ya gelê Kurd jinûve hişyar bibe. Dengê her welatparêzên ku di têkoşîna rizgariyê de dibêjin ‘Ez Kurdistanî me’ li Rojava bilind bû. Rojava nîşaneya herî xurt a berxwedana topyekûn a li dijî çeteyên DAÎŞ’ê û piştevaniya neteweyî bû. Nasnameya Kurd di vê demê de ne tenê aîdiyeteke etnîkî bû, her wiha veguherî semboleke lêgerîna edalet, wekhevî û azadiyê. Yek ji mirovên ku li ber êrişên çeteyên DAÎŞ’ê yên li ser gel rabûn jî şervanê YPG’ê Bahoz Tekman bû.
‘DESTPÊKÊ QAD Û HEVRÊYÊN XWE NAS KIR’
Ji hevrêyên wî yên têkoşînê Rûxweş Efrîn qala têkoşîna Bahoz Tekman kir.
Rûxweş Efrîn anî ziman ku di sala 2016’an de Bahoz Tekman nas kir û got, “Wê demê em di Pêngava Şehbayê de bûn. Hevalê Bahoz jî ji Kantona Cizîrê derbasî Şehbayê bûbû. Weke sabotajvanekî tevlî eniyên herî pêş ên Pêngava Şehbayê bû. Ji ber ku li Şehbayê nû bû destpêkê qad û hevalên xwe nas kir. Me jî destpêkê hevalê Bahoz nas kir. Wê demê şer giran bû. Hema hema hemû heval li eniyê bûn. Hevalê Bahoz tevlî ku qad baş nas nedikir jî li eniya herî pêş bû. Dema ku operasyon li gundekî dihate kirin yek ji wan hevalên destpêkê bû ku xwe pêşniyar dikir. Weke sabotajvanekî bi roleke mezin rabû.”
‘NEXWEST HEVALAN BI TENÊ BIŞÎNE ENIYÊ, LI REFÊN HERÎ PÊŞ BÛ’
Rûxweş Efrîn bal kişand ser taybetmendiyên Bahoz Tekman û got, “Hem gelekî xwîngerm bû hem jî ji ber ku nedixwest hevalên xwe bi tenê bişîne eniyê timî li refên pêş bû. Di bin êrişên giran de, di nava şer de gelek mayin bêbandor kir ku heval karibin xwe bigihînin çeperan. Ji bo bi hevalan re bibe yek hewl dida. Dixwest di demeke kurt de her kesî nas bike.”
PIŞTÎ KU REHET BÛ LI ENIYÊ VEGERIYA
Rûxweş Efrîn diyar kir ku Bahoz Tekman sala 2016’an ji lingê xwe bi giranî birîndar bû û got, “Xwedî kesayetiyeke welê bû ku erk û berpirsyariyên xwe di cih de bi cih dianî, bi hawara hevrêyên xwe ve diçû. Vê yekê têkiliyên me yên hevrêtiyê xurt kir. Bi qasî ku ji bo hevrêyên xwe hesas bû di mijara mayinekê de jî ewqasî bi hesasiyet nêzîk dibû. Ji bo ewlhiya xwe û hevrêyên xwe gelekî hesas tevdigeriya. Êrişên giran ên dijmin hebûn. Em jî gav bi gav bi pêş ve diçûn. Roj nebû ku şer nediqewimî, fîşek li me nedihat barandin. Çeteyan her wiha qad bi temamî bi mayinan dagirtibûn. Di rewşeke bi vî rengî ya giran de Bahoz demeke kurt birîndar bû. Ji lingê xwe birîndar bû.
Tevî ku birîna wî gelekî giran bû di demeke kurt de xwe komî ser hev kir û careke din li eniyê vegeriya. Zanîbû ku pêngav çiqasî giran e û divê zû rehet bibe. Nedixwest hevrêyên xwe bi tenê bihêle. Ji ber vê jî birîna xwe zû pêçand, hevrêyekî bi îrade û xurt bû. Ji cihê ma dewam kir. Birîn li pêşiya xwe nekir asteng. Coş û moralê wî mîna roja destpêkê bû.
SABOTAJVANÊN NÛ PERWERDE KIR
Ji bo gihandina sabotajvanên nû agahiyên xwe, tecrûbeyên xwe bi hevrêyên xwe re parve kir. Rê û rêbaza têkbirina taktîk û teknîka dijmin dîtibû, di vê çarçoveyê de tecrûbeyên xwe bi xurtî parve dikir. Di nava şerê giran de agahiyên xwe nû dikir. Hewl dida huner û sabotajvaniya xwe bi pêş bixîne. Dema ku hevalê Bahoz li eniyekê bû, hevrêyên wî dilrehet bûn. Zanîbûn ku wê li mayinekê neqelibin.”
TEVLÎ BERXWEDANA 58 ROJAN A EFRÎNÊ BÛ
Rûxweş Efrîn anî ziman ku Bahoz Tekman piştî Pêngava Şehbayê di dema êrişa dewleta Tirk a li ser Efrînê de weke sabotajvanekî li refên herî pêş tevlî şer bû û got, “Xwe ji şer negirt. Li refên pêş sabotajvan bû. Ji bo artêşa Tirk a dagirker bi gaveke bi tenê jî navêje Efrînê bi dil û can şer kir, ked da û pêvajoyeke zehmet derbas kir. Li Bilbilê li ber xwe dida. Her ku êriş berfireh dibûn, wezîfe û berpirsyariyên wî jî zêde bûn. Gelek mayinên dijmin bêbandor kir. Gelek çalakiyên sabotajê pêk anî ku derbên giran li dijmin xist. Ji bo dijmin gaveke bi tenê jî bi pêş ve neçe, xwe kir çeper. Di roja destpêkê ya şer de li hemberî teknîka dewleta Tirk a ku bi 72 balafiran êriş kir, bi derfetên kêm şer kir. 58 rojan li her kêliya berxwedanê bû.
LI ŞEHBAYÊ LI SER KAR BÛ
Piştî 58 rojan bi gel û hevrêyên xwe re derbasî Şehbayê bû. Li wir jî nesekinî. Timî di nava liv û tevgerê de bû. Bi yekîneya sabotajê re eleqedar bû, di heman demê de li pey taktîkên nû amadekarî ji çalakiyê re dikir. Piştî ku dewleta Tirk Efrîn dagir kir jî dawî li çalakiyên xwe neanî. Bi rêxistinî, plankirî û pêşdîtî di amadekariyên çalakiyan de pêşengî ji her çalakiyeke sabotajê re kir.
‘AMADE BÛ KU CANÊ XWE JI BO GELÊ XWE BIDE’
Ji bo gelê Efrînê careke din li xaka xwe vegere amade bû ku canê xwe bide. Ji ber ku gelekî bi xelkê Efrînê re dilsoz bû. Bi kûrahî jê hez dikir û dilsoz bû. Digot, sal derbas bibin jî em ê Efrînê jinûve bi dest bixin. Derfetên çalakiya sabotajê nebûya jî bi baskê êrişê re tevdigeriya. Lewma dilsozê welat, xak û gelê xwe bû. Piştî berxwedana 58 rojan bêrawestan bi ser dijmin ve meşiya. Her timî amadekarî ji çalakiyê re dikir. Bi moral û coş bi ser dijmin ve dimeşiya.”
* Bahoz Tekman (Alî Saît Cîhanoglû) li gundê Kefer Mizê yê navçeya Şera ya Efrînê di 19’ê Hezîrana 2018’an de di çalakiya li dijî leşker û çeteyên Tirk de şehîd bû.
