Komîserê Bilind ê Mafên Mirovan ê Neteweyên Yekbûyî Volker Turk anî ziman ku hin dewlet amûrên ji hişê çêkirî ji bo şopandina li ser înternetê ya rojnamevanan û çavkaniyên nûçeyan bi kar tînin û got, “Ev rêbaz mafê agahîwergirtinê û nepenîtiya şexsî binpê dike; li seranserê cîhanê bandora sarkirinê dike ku çapemeniyê ditepisîne.”
Turk ragihand ku hişê çêkirî ji hilberîna nûçeyê heta bi belavkirina wê hemû pêvajo veguherandiye, lê belê rîskên cidî jî bi xwe re aniye. Turk got, “Algorîtmayên ji hişê çêkirî di asteke bilind de diyar dike ku em ê çi bibîni, bi vî rengî fikrê me bi xwe diafirîne” û anî ziman ku siyasetmedar vê teknolojiyê ji bo dezenformasyonê û pêşvebirina rojeva xwe bi kar tînin.
Turk got, “Hema bibêje şîrketeke bi tenê yan jî komek li ser teknolojiya hişê çêkirî kontrola giştî pêk tîne û bandorê li medya navneteweyî dike.”
Turk diyar kir ku Roja Azadiya Çapemeniya Cîhanê ya ku ji sala 1993’an û vir ve her 3’ê Gulanê tê pîrozkirin, ‘ji bo guhertina rêgehê banga dawî ye’ û got, “Eger em niha nekevin nava liv û tevgerê, dibe ku azadiya çapemeniyê û pergala civaka demokratîk zerareke mezin bibîne ku vegera jê nebe.”
