Newroz li navçeya Dep a Xarpêtê hate pîrozkirin ku warê Mazlûm Dogan e, ku li Girtîhga Amedê di 21’ê Adara 1982’an roja Newrozê de canê xwe feda kir. Li gel siyasetmedar Gultan Kişanak, parlamenterên Partiya Demokrasî û Wekheviyê ya Gelan (DEM Partî) û hevşaredar jî tevlî pîrozbahiyê bûn. Gelek kes bi kincên neteweyî li qada pîrozbahiyê bûn. Girseya gel demeke dirêj govend gerand û dirûşmên ‘Bijî Serok Apo’, ‘Bijî berxwedana zindanan’ qîriya.
Newrozê bi deqeyeke rêzgirtinê ya ji bo bîranîna cangoriyên têkoşîna azadî û demokrasiyê destpê kir. Piştre endamên Komîteya Amadekar a Newrozê cejna Newrozê li beşdaran pîroz kirin. Hevşaredarên Depê Songul Duzgun û Cafer Ogûr û Hevserokê navçeyê yê DEM Partiyê Bekîr Polat bi kurtî axviîn. Polat diyar kir ku ew di demeke dîrokî de ne û hêviya xwe anî ziman ku ev pêvajo aştî û azadiyê ji her kesî re bîne.
ARÎFE YILDIRIM: BILA TÊKOŞÎNA ME BIBE WESÎLEYA AŞTIYÊ
Xwişka Mazlûm Dogan Arîfe Yildirim jî got, “Bila têkoşîna me bibe wesîleya aştiyê.” Yildirim êrîşên li dijî Elewiyên li Sûriyeyê şermezar kir.
Piştre jî Koma Vejîn derkete ser dikê û hunera xwe pêşkêş kir.
Parlamenterên DEM Partiyê, siyasetmedara Kurd Gultan Kişanak û nûnerên partiyê dûre li ber dirûşma ‘Bijî Newroz’ agirê Newrozê dadan.
Parlamentera Dersimê ya DEM Partiyê Ayten Kordû got, “Bi banga dîrokî re wê agirê Newrozê li her derê hîn bilind bibe.”
Parlamenterê Çewlîkê yê DEM Partiyê Omer Farûk Hulaku jî bal kişand ser banga Rêber Apo û anî ziman ku bang ji bo jiyana wekhev û azad a gelan e û Newroz li Rêber Apo pîroz kir.
Gultan Kişanak jî destnîşan kir ku ew gelekî nêzî armancên xwe yên paşerojeke demokratîk û azad in.
Gultan Kişanak diyar kir ku Rêber Apo li gel tecrîd û dîlgirtina mezin jî bi berpirsylarî û wêrekiyeke mezin berpirsyarî hilda ser milê xwe û got, “Niha weke gel dem hatiye ku em vê berpirsyariyê parve bikin, hilgirin ser milê xwe. Li pêşiya me hîn gavên krîtîk hene ku divê bêne avêtin. Birêz Ocalan bi berpirsyarî rabû û ev banga dîrokî kir. Niha jî kêliya herî girîng ew e ku şert û mercên azad ên Birêz Ocalan bêne afirandin û tevlî pêvajoyê bê kirin.”
Kişanak bang li Erdogan kir ku bi berpirsyarî rabe û guhertinên qanûnî bê kirin, siyaseta demokratîk bi vê berpirsyariyê rabe.
Kişanak got, “Em ê lê temaşe nekin, em ê li bendê nemînin, em ê bi berpirsyarî tevbigerin ku kesekî din jiyana xwe ji dest nedin. Em ê hîn bêhtir bixebitin, hîn bêhtir xwe bi rêxistin bikin û bi ser bikevin.”
Pîrozbahiya Newrozê bi stranên Ciwan Adar bi dawî bû.
